Tarka, Urdu Nazam By Jameel Ur Rahman

آدمی

جاتے ہوئے

چھوڑ جاتا ہے اپنے پیچھے

اپنی دھوپ یا چھاؤں کا

اضافی حصہ

وہ نہیں جانتا

جس دھوپ کی کرنیں

اُس کے تپتے ہوئے وجود سے پھوٹیں

اُن کا مصرف کیا تھا

اُن کے ہاتھوں کتنے خرمن جلے

یا کتنی شاخوں میں پھل پڑے

جس چھاؤں نے

اُس کی روح کی گواہی دی تھی

اُس نے کتنے مسافروں کا ہاتھ تھاما

یا کتنوں کو زہریلی نیند سے ہمکنار کیا

آدمی جاتے ہوئے

پھر بھی چھوڑ جاتا ہے

دوراتوں کی دیواروں کے درمیان

اپنی صبح اور اپنی شام

اُن لمحوں کا حساب کرنے کے لیے

جب وہ بہت اکیلا تھا

آدمی لرزتا رہتا ہے

وقت کے محور پر ایک عکس کی طرح

اُس کی دھوپ یا چھاؤں

اُس کی صبح یا شام

عکس کو تجسیم نہیں کرسکتی

اور آئینہ یونہی رہتا ہے

کسی نام کی تختی کے بغیر

ایک انجان ہاتھ

اُس کے وجود کےحصے

بخرے کرتا رہتا ہے

اور وہ چلا جاتا ہے

اُس ہاتھ کی تلاش میں

اپنے پیچھے چھوڑ کر

برادے کی طرح پھیلی ہوئی

دھوپ اور چھاؤں کا اضافی حصہ!!!!!!!!!!