Harf Zadi, Urdu Nazam By Jamil Qamar

حرف زادی

سنو!اے حرف زادی تم

بھلے مجھ سے نہیں ملنا

اگر قسمت بھی چاہے تو

تمہیں حق ہے تم انکار کر دینا

یہ دنیا ایک رستہ ہے

کہیں چلتے ہوئے رستے میں

ہو سکتا ہے اپناسامنا ممکن

تمہیں حق ہےمیری پہچان مت کرنا

میری صورت جو دیکھو تو

نگاہیں پھیر لینا تم

کہ اپنی ذات کے اوپر

تو حق اپنا ہی ہوتا ہے

تمہیں حق ہے

یہ جو لفظ نگری ہے

تمہاری ہی رعایا ہے

جسے تم نے جہاں پر حکم دیناہے

وہیں وہ لفظ ٹھہرے گا

تم اپنی اس رعایا کوبھلے سے حسنِ فانی کے قصیدے حفظ کرواؤ

سنو اے حرف زادی تم

تمہارا حق نہیں بنتا

کہ جو آفاقی جذبہ ہے

اسے تشبیہ دے ڈالو تم اپنی خود فریبی سے

کہ اپنی بد گمانی کی بھڑکتی آگ سے تم اس

حقیقت سی محبت کو جلانے کی کرو کوشش

حقیقت بھی وہ جس کے روپ میں اللہ دکھتا ہے

مجھے تم میرے سر سے لیکر پاؤں تک

تمہیں حق ہےکہ جھٹلا دو

سلگتی بے یقینی کےیہ چنگاری سے لہجے سے

میرے اس جسدِ خاکی کو بھلے تم خاک کر ڈالو

مگر میری آنکھوں کے پسِ پردہ

تم اپنی اس محبت کو کبھی نہ نوچ پاؤ گے

جو مجھ کو میرے اللہ نے ودیعت تب ہی کر دی تھی

کہ جب اس جسدِ خاکی کا

نہ دنیا میں نشاں تھا۔۔۔۔۔۔۔۔