Wo Bigar Ka Ja Chuka Iss Baat Ko Arsa Hua, Urdu Ghazal By Junaid Akhter

وہ بگڑ کر جاچکا اِس بات کو عرصہ ہوا

راز ہے اب تک یہ لیکن کیوں ہوا اور کیا ہوا

ایک ہی لمحے کو لیکن اُن سے جب نظریں ملیں

تھم گئیں سب گردشیں پانی رکا بہتا ہوا

تھی جدائی کی گھڑی میں بے یقینی کس قدر

رُک گیا تھا آسماں پر آب و ِگل ملتا ہوا

مل گئیں حوریں کسی کو کوئی جنت لے گیا

میں ہی اک صبحِ قیامت رہ گیا سوتا ہوا

روشنی کی وہ ہوس تھی بجھ گئیں آنکھیں مری

میں نے آنکھوں سے لگایا تھا دیا جلتا ہوا

مت کرو تم فکر میری کچھ نہیں ہوگا مجھے

آج تک زندہ ہوں میں ہر روز ہی مرتا ہوا

وہ مرادیں پا گئے جو اک اشارے پر اُٹھے

کیا کروں میں ناتواں تھا رہ گیا لیٹا ہوا

پھر یہ سوچیں گے تمھیں ہم دل دکھائیں یا نہیں

آؤ پہلے دیکھ لو یہ آبلہ پھوٹا ہوا

جھوٹ لکھے گا فرشتہ جب بھی تم بولو گے یہ

ہے خدا کا شکر جو کچھ بھی ہوا اچھا ہوا

یاد کرتا ہے تجھے اخترؔ ترا ہر حال میں

جاگتا، سوتا ہوا لیٹا ہوا بیٹھا ہوا