Aao Tareekh Phir Se Morattab KareN, Urdu Nazam By Kausar Mahmood

جو ازل تا ابد کا احاطہ کرے

جس کے اوراق پر سچ کا جوہر کِھلے

جس کے الفاظ میں روشنائی ملے

جس پہ اپنوں کا ایمان و ایقان ہو

اور اغیار میں مستند جور ہے

آﺅ تاریخ پھر سے مرتب کریں

آﺅ تاریخ پھر سے مرتب کریں

جو فقط بادشاہوں کے جاہ و حشم،

سیم و زر کے خزائن، جواہر حرم ،

شاہزادوں کے نام و نسب کے بیاں،

اور جنگ و جدل سے عبارت نہ ہو

جس میں اہل حَکَم کی ستائش نہ ہو

جس میں اسلاف کی لن ترانی نہ ہو

اور زخموں کی بے جا نمائش نہ ہو

صرف روشن روایات کی تتلیاں

لے کے ساری روا داریوں کی مہک

اپنے آثار کے آئینوں سے اُڑیں

گُلعذاروں پہ خوشبو نچھاور کریں

لوک ورثے کے دستِ ہنر پہ کھِلیں

آﺅ تاریخ سچ کی بنا پر لکھیں

جس میں دانشوروں، شاعروں، بُت گروں،

اہلِ فن کے کمالات کے سب نشاں

عام لوگوں کے دکھ درد کی داستاں

اپنی دھرتی کے رنگوں کی قَوسِ قُزَح

آسمانی عقائد کی نیرنگیاں

قریہ قریہ کھِلے موتیا اور گلاب

آنگن آنگن کھِلی رات کی رانیاں

پڑھنے والوں کو پہلو بہ پہلو ملیں

سب مکاتب، کشادہ محاریب پر

با حُروفِ جَلی یہ دعا بھی لکھیں

فن کی دیوی کہیں دان درشن کرے

ہم بدستور اُس کے پُجاری رہیں

زندہ لوگوں سے برگد کی چھاﺅں ملے

روشنی کے منابع مزارات سے

فیض کے سلسلے جاری ساری رہیں

لوک دانش سے آراستہ میکدے

اِک نئے عہد نامے کی بنیاد ہوں

سرد آتش کدے پھر سے آباد ہوں

سب محبت کے داعی معلم بنیں

مدرسے تارہ تارہ چمکتے رہیں

اپنی تاریخ کی مہرباں گود میں

میرے بچے ہمیشہ ہُمکتے رہیں

آﺅ تاریخ پھر سے مرتب کریں

آﺅ تاریخ سچ کی بنا پر لکھیں

جو ازل تا ابد کا احاطہ کرے