Sidharath Ki Tarha Tum Ko Pata Hae, Urdu Nazam By Kausar Mahmood

سدھارتھ کی طرح تم کو پتہ ہے

آنے والا کل تمہارا ہے

وہ یوں کہ لمحۂ موجود اب تک ملتجی ہے

تم اجازت دو تو وہ گزرے

جو تم چاہو، تمہارے لمس کا اعجاز

بنجر، سخت، پتھریلی زمینوں کو بھی، پل بھر میں ہرا کر دے

جو تم چاہو، تمہاری شبنمی آواز

سورج کو سمندر میں کھڑا کر دے

ذرا آئینہ تو دیکھو، تمہیں کس نے بنایا ہے

تبسم۔ مرمریں مورت، ترا شیدہ زمانوں کی

تکلّم۔ شعرِ غالب، خامشی منٹو فسانوں کی

ادا.... مانی کی تصویریں، جھلک بہزاد کے آئینہ خانوں کی

سدھارتھ بھی اگر ہوتا، زبانِ حال سے کہتا

تمہارا ہے، تمہارا ہے

گذرتے وقت کا دھارا

اجنتا اور ایلورا۔ ہڑپہ اور گندھارا

تمہارا ہے، تمہارا ہے

تمہیں جب سوچتا ہوں میں، گماں اکثر گزرتا ہے

چمکتے رُوپ کا سونا، مہکتے جسم کی چاندی

یہ صندل کا بنا پیکر، گلابوں سے بھری ڈالی

یہ خُلقِ بے بدل اپنا، یہ حُسنِ لَم یَزَل اپنا

یونہی اِک دن، اچانک، تم کسی کو دان کر دو گے

اور اپنے عہد کے شاعر کو بس حیران کر دو گے