Sun Ee Mere Dil Sun Zara Allah Bass, Urdu Ghazal By Khalid Azaz

سُن اے مرے دل سُن ذرا اللہ بس باقی ہوَس

تجھ کو نہیں کچھ سُوجھتا اللہ بس باقی ہوَس

وقتِ سحر ہم نے سنا،شب ہائے غم کا ماجرا

ہر سمت سے آئی صدا ،،اللہ بس باقی ہوَس،،

بھنورا کلی کی تاک میں، آخر ملے گا خاک میں

چاہت ،محبت کا صلہ ۔۔اللہ بس باقی ہوَس

میں نے کہا کچھ بولیے ،رازِ ازل اب کھولیے

بس پھر اُنھوں نے یہ کہا ،،اللہ بس باقی ہوَس،،

مُرشد نے تو فرما دیا،اچھی طرح سمجھا دیا

جو سُن کے ہم پر یہ کھلا ۔۔اللہ بس باقی ہوَس

دیوارِ عقبیٰ ڈھونڈیے ،سر جا کے اُس میں پھوڑیے

دنیا تو ہے مکر و ریا ۔۔۔ اللہ بس باقی ہوَس

دھڑکن میں سرگم ہے رواں ،سرگم میں تیرا نام ہے

دھا سا رے ما پا گا رے سا ۔۔اللہ بس باقی ہوَس

رادھا کہے گھنشام سے،مِیرا کہے یہ رام سے

ہم نے سُنا ،تم نے سُنا ،،اللہ بس باقی ہوَس،،

میلے سے بیلے کی طرف ،ہیں لوگ جاتے صف بہ صف

دل انت یاں اُکتا گیا ۔۔۔اللہ بس باقی ہوَس

دل میں نہاں جو راز ہے،وہ راز تواعزازہے

دو گھُونٹ اور اے ساقیا ۔۔اللہ بس باقی ہوَس