Wo Aurat Thi, Urdu Nazam By Khumar Mirzada

وہ عورت تھی

مگر اک روپ میں ہونا اسے ہرگز نہ بھاتا تھا

وہ ہمت میں کوئی مرد توانا تھی جسے محنت محبت اور

انسانی زمانی جاودانی فلسفوں کے تحت جینا تھا

وہ ایسی راہبہ تھی

جس کے دامن میں دعائیں تھیں

دوائیں تھیں

مناجاتیں تمنائیں وفائیں کامنائیں

سب اسے تقسیم کرنا تھا

وہ ماں تھی

جس نے سائے میں چھپا رکھے تھے دکھ ان آتماؤں کے

جنہیں محرومیت میراث ملتی تھی

اسے آزار اپنانا بہت اچھا لگا کرتا تھا

اسی نے درد سینے میں بسانے کے ہنر سے نام پایا تھا

بہن تھی

جس نے بھائی کہہ دیا تو لاج رکھ کر کے دکھایا بھی

وہ ہر اک دکھ کو اپنا دکھ سمجھتی تھی

مگر اپنی خوشی اوروں میں ریزہ ریزہ یوں تقسیم کرتی تھی

کہ جیسے اس کو قسمت نے مقرر کر رکھا ہوگا

سنا ہے اس کے جا چکنے سے سارے شہر میں وہ درد پھیلا ہے

جسے اس نے

چھپا رکھا تھا سینے میں

سنا ہے بستی والے لوگ اس کو یاد کرتے ہیں

ہر اک بچہ یتیمی رو رہا ہے

بین کرتے ہیں وہ سب جن کو

زمانے نے غریبی اور محرومی نوازی تھی

سنا ہے اس کو وہ بھی رو رہے ہیں جن کو آنسو رولنا آتا نہیں تھا

سنا ہے شہر کے گوشوں میں اس کی شبنمی آواز سارے درد لوٹانے کو ٹھہری ہے

سنا ہے اس نے اب اس شہر سے منہ موڑنے کی ٹھان رکھی ہے

وہ عورت تھی

مگر اک روپ میں جینا اسے آتا نہیں تھا