Yehi Hi Sab Kuch Hai, Urdu Nazam By Khumar Mirzada

یہی سب کچھ ہے

اگر ٹھہری ہوئی گہری نظر سے دیکھو

بے سبب آنکھ سے بہتی ہوئی اشکوں کی قطار

کپکپاتے ہوئے ہونٹوں کا سکوت

جسم کے تند مہ و سال

زمانے کی جھلستی ہوئی دوپہر میں سائے کے سلگتے اندام

سانس کی لہر سے لرزا ہوا زلفوں کا حصار

رقص کرتی ہوئی خواہش سے چھلکتے ہوئے زرد ایام

تمام

مان لیتے ہیں کہ یہ وقت بدلتے لہجے

اب بھی اعجاز دکھا سکتے ہیں

یہ مسیحائی کا جھریوں بھرا چہرا اب بھی

مسکراہٹ کے لیے تازگی چن سکتا ہے

یہ گزشتہ کا فسوں بخت حوالے اب بھی

وقت کی نبض تھما سکتے ہیں

لیکن ایسا ہے کہ جب دھڑکنیں گھنگھرو بن جائیں

خواہشیں رقص کیا کرتی ہیں سکوں کی جھنک بولتی ہے

تھرتھراتے ہوئے جسموں سے حواسوں کا دھواں اٹھتا ہے

اشتہا آگ جنا کرتی ہے

بھوک عفریت ہے

وحشت ہے بڑی آفت ہے

بھوک خمیازۂ جان و تن ہے

بے پر و بال کیا کرتی ہے

وقت کی تال کو بے تال کیا کرتی ہے

بھوک اعصاب شکستہ کی کھلی بیعت ہے

یہ خد و خال کچل دیتی ہے

تہذیب کے ریشوں کو مسل دیتی ہے

اور سرمایہ پرستی کے سنہرے ایام

گرد رخسار شب و روز پہ مل جاتے ہیں

سینۂ خاک کو دہلاتا ہوا صور فلک

مطمئن خاک نشینوں کے لیے

روز ہی روز وغا لاتا ہے

اور شب و روز مہ و سال میں ڈھل جاتے ہیں

یہی سب کچھ ہے اگر ٹھہری ہوئی گہری نظر سے دیکھو

سرخیٔی چشم کہیں پہلوئے بے تاب کہیں

بے کراں باہیں کہیں

لمس کہیں

خواب کہیں

لہریا پردوں سے چھنتی ہوئی شاموں کا نشہ

جسم سہلاتی ہوئی رات کا نم

بیش نہ کم