Tagore Mohabbat Ka Farishta, Urdu Nazam By Maikash Hyderabadi

bansuri ki lai pe jaise jagte taron ka nach
sardiyon ki kapkapi ko chum le jis tarah aanch
chandni ki karwaTen jaise andheri raat mein
jaise naddi ki rawani aaKHiri barsat mein
jaise lahren chheD den dhime suron mein jal-tarang
jaise kaliyon mein sama jae bahaaron ki umang
ban ki KHamoshi mein jaise mast koyal ki pukar
aasman ki chhat pe jaise abr ke naqsh-o-nigar
jaise kohsaron ke mathe par shafaq ki dhaariyan
jaise titli ki hasin parwaz mein gul-kariyan
subh ke sine pe thirke jaise suraj ka jamal
raat ke KHwabon mein jagen jaise din bhar ke KHayal
kale kale aasman mein jaise bijli ki lakir
jaise zanjiron se khele qaid-KHane mein asir