Fiker Per Hai Mere Faizan Aba Abdullah, Urdu Marsiya By Majeed Akhtar

فکر پر ہے مرے فیضانِ ابا عبداللہ

تھام کے چلتا ہوں دامانِ ابا عبداللہ

چشم خونبار ہوئی، تارِ نفس گریہ کناں

مرثیہ لکھنا تھا شایانِ ابا عبداللہ

سایۂ چادرِ تطہیر ملا دنیا میں

حشر میں سایۂ دامانِ ابا عبداللہ

حلقۂ ُقدسیاں تکتا ہے بڑے رشک کے ساتھ

حلقۂ شاہ سوارانِ ابا عبداللہ

حُرؓ ترے دل کی خلش، جرم پہ بھاری ٹھہری

مرحبا، مرحبا مِیزانِ ابا عبداللہ

اک عجب شان سے اٹھا ہے قلم مدحت میں

سر پہ ہے خاکِ غلامانِ ابا عبداللہ

اے َفرَزدَق مرے اس اوجِ مقدر کو بھی دیکھ

ہوں فرستادۂ ایوانِ ابا عبداللہ

شربتِ دید عطا ہو کہ میں تشنہ ہوں بہت

کچھ سفارش کریں، طِفلانِ ابا عبداللہ

دینِ اسلام ہے احسانِ رسولِ عربی

دینِ اسلام پر احسانِ ابا عبداللہ

تم پہ قربان، نصیرانِ حسینؑ ابنِ علیؑ

لعنۃ اللہ، حریفانِ ابا عبداللہ

ہائے کیا تیر تھا یکدم ہی لہو رنگ ہوا

خونِ بے شیر سے دامانِ ابا عبداللہ

سینۂ اکبرِ مہ رُو پہ لگی جبکہ سناں

خون سے تر ہوئیں چشمانِ ابا عبداللہ

کچھ کٹے سر ہیں تو کچھ سجدہ گہیں خوں آلود

قید میں آیا ہے سامانِ ابا عبداللہ

بابی انت و اُمّی یا ابا عبداللہ

خاکپائے غلامانِ اہلبیتؑ