Hubb-e-watan, Urdu Nazam By Mohammad Husain Azad

ai aaftab-e-hubb-e-watan tu kidhar hai aaj
tu hai kidhar ki kuchh nahin aata nazar hai aaj
tujh bin jahan hai aankhon mein andher ho raha
aur intizam-e-dil hai zabar zer ho raha
ThanDe hain kyun dilon mein tere josh ho gae
kyun sab tere charagh hain KHamosh ho gae
hubb-e-watan ki jins ka hai qaht-sal kyun
hairan hun aaj-kal hai paDa us ka kal kyun
kuchh ho gaya zamana ka ulTa chalan yahan
hubb-e-watan ke badle hai bughz-e-watan yahan
bin tere mulk-e-hind ke ghar be-charagh hain
jalte ewaz charaghon ke sinon mein dagh hain
kab tak shab-e-siyah mein aalam tabah ho
ai aaftab idhar bhi karam ki nigah ho
aalam se ta ki tira-dili dur ho tamam
aur hind tere nur se mamur ho mudam
ulfat se garm sab ke dil-e-sard hon baham
aur jo ki ham-watan hon wo hamdard hon baham
ta ho watan mein apne zar-o-mal ka wafur
aur mumlikat mein daulat-o-iqbaal ka wafur
sab apne hakimon ke liye jaan-nisar hun
aur gardan-e-harif pe KHanjar ki dhaar hon
ilm-o-hunar se KHalq ko raunaq diya karen
aur anjuman mein baiTh ke jalse kiya karen
labrez-e-josh-e-hubb-e-watan sab ke jam hon
sarshaar-e-zauq-o-shauq dil-e-KHas-o-am hon