Meri Jaan-e-KHana-ba-dosh Ko Wo Sukun Mila Tere Shahr Se, Urdu Ghazal By Mohammad Owais Malik

meri jaan-e-KHana-ba-dosh ko wo sukun mila tere shahr se
ki main kuch karne ke baad bhi na bichhaD saka tere shahr se

main sahab ban ke hawaon mein tujhe DhunDhta tha fazaon mein
so tere makan pe baras paDa jo guzar hua tere shahr se

teri rahguzar se lagaw tha tere aastan pe paDaw tha
tera hukm tha ki safar karun so main chal paDa tere shahr se

na wo bijliyan thin jamal ki na wo barishen thin visal ki
kai hasraton se aTa hua main guzar gaya tere shahr se

mera naKHl-e-zat ujaD gaya main teri zamin se ukhaD gaya
koi gard-baad junun ka mujhe le uDa tere shahr se

kahin taKHliye ko jo pa liya wahin boriye ko bichha liya
main ne koh-o-dasht ki KHalwaton ka maza liya tere shahr se

main dayar-e-ghair mein ajnabi kabhi is gali kabhi us gali
main teri gali ka asir tha mujhe ishq tha tere shahr se

na main kohkan na main qais tha main tere nagar ka 'owais' tha
unhen bandaman se thin nisbaten mera silsila tere shahr se