Duniya Mein Koi Ranj Se BaDh Kar KHushi Nahin, Urdu Ghazal By Mohammad Yusuf Rasikh

duniya mein koi ranj se baDh kar KHushi nahin
wo bhi hamein nasib kabhi hai kabhi nahin

dard-e-jigar ki tum pe musibat paDi nahin
tum to kahoge ishq ki manzil kaDi nahin

dushman ki rah rok ke baiTha hun aaj main
duniya ka rasta hai tumhaari gali nahin

dushman ki maut ka tumhein kyunkar na ho malal
ek ba-wafa jahan mein wahi tha wahi nahin

shoKHi kisi ki khul gai aaKHir kalim par
karne ki thi jo baat wahi un se ki nahin

qatron ke lab pe shor-e-anal-bahr hai rawan
taqlid kya ye hazrat-e-mansur ki nahin

ifa-e-ahd hai ki qayamat ka shor hai
tum khul ke kah na do ki zaban hum ne di nahin

laila ne KHud qarar diya hai wafa ko jurm
majnun ne wo kitab-e-mohabbat paDhi nahin

kaTne ko kaT rahi hai barabar shab-e-firaq
jine ko ji raha hun magar zindagi nahin

tum ko fareb-e-ghair se aagah kar diya
warna mujhe kisi se koi dushmani nahin

rota hai be-sabaati-e-gulzar-e-dahr par
ghunche ke lab pe ghaur se dekho hansi nahin

aankhon ne phuT phuT ke sab haal kah diya
ain-e-visal mein bhi yahan KHamushi nahin

pir-e-mughan ke faiz se raushan hai mai-kada
saghar ka jo murid nahin muttaqi nahin

aaram se qafas mein guzarunga zindagi
achchha hua ki taqat-e-parwaz hi nahin

aati hai KHak-e-tur se ab tak yahi KHuda
dil ki lagi ka zikr koi dil-lagi nahin

aashiq ke dam se husn ki duniya ko hai farogh
bulbul nahin to raunaq-e-gulzar hi nahin

dilbar ke intiKHab mein mujh se KHata hui
mera qusur hai ye KHata aap ki nahin

wahdat ka wo surur tha saqi ke jam mein
pine ko hum ne pi hai magar be-KHudi nahin

puchha tha bewafa to na paya raqib ko
main ne bhi kis maze se kaha hai ki ji nahin

khane ko zaKHm milte hain pine ko ashk hain
rozi jahan hain kya meri taqdir ki nahin

aashiq ke zaKHm dekh ke isa ne kah diya
ye to nazar ki choT hai talwar ki nahin

tishna-labon ki jaan hai shamshir-e-ab-dar
KHwahish unhen to kausar-o-tasnim ki nahin

jumbish hui hai dashna-e-ghamza ko be-sabab
allah KHair aalam-e-asbab ki nahin

jis samt aankh uThti hai kushton ka Dher hai
maqtal hai aashiqon ka tumhaari gali nahin

jannat se kuchh gharaz hai na duniya se wasta
mashuq apna hur nahin hai pari nahin

KHana-KHarab-e-ishq ki haalat na puchhiye
koi bhi gham-gusar ba-juz bekasi nahin

inkar ab to is lab-e-nazuk se ho chuka
pahli si shakl ghuncha-e-ummid ki nahin

tu KHana-zad-e-zulf ko aazad kyun kare
main to tera ghulam hun main aadmi nahin

huron ko bhej kar meri haalat to puchhiye
kunj-e-mazar bais-e-dil-bastagi nahin

ek mah-ru ki yaad ne chamka diya hai dil
sina hai dagh dagh magar tirgi nahin

tasir aah ki kabhi tum ko dikhaenge
hum hain to gumbad-e-falak-e-chambari nahin

barish hi ko ulaT ke bana do na tum sharab
tum ko zara mazaq-e-adab-parwari nahin

rota hai koi dil ko koi apna jaan kar
Daka hai luT-mar hai ye dilbari nahin

aankhon se qatl karte ho lab se jalate ho
phir ye kamal kya hai jo afsun-gari nahin

talib ki aankh karti hai KHira shua-e-husn
parda hai us ka nam ye be-pardagi nahin

zamzam haram se aata hai 'rasiKH' ke waste
wo KHana-e-KHuda hai wahan kuchh kami nahin

'rasiKH' kise sunaen hum apna bayan-e-gham
'ghaalib' nahin 'anis' nahin 'anwari' nahin