Teri Mansha Hai Khamoshi Meri Hai Marzi Awaz, Urdu Ghazal By Nasira Zuberi

تیری منشا ہے خاموشی میری ہے مرضی آواز

آؤ مل کر آج بنائیں ہم کوئی فرضی آواز

چھاگل بھی لبریز ہے اب تو لیکن میری گونگی پیاس

تیری اوک سے پینا چاہے ٹھنڈے چشمے کی آواز

کس کی ہو زرخیز سماعت کس کی بنجر کیا معلوم

بھٹکے ہر اک سمت ٹٹولے ہر رستہ اندھی آواز

دل سے لب تک آتے آتے لفظ بدل جاتے ہیں اب

پہلے آ جاتی تھی ہونٹوں پر خالص سچی آواز

ایک سے ہیں آداب زباں بندی کے ہر اک محفل میں

صبر کا جام اٹھا اے دل اور خاموشی سے پی آواز

عذر اصول جواز کے چرخے کات رہا ہے ہر کوئی

تو بھی اپنی مجبوری کا دھاگا لے اور سی آواز

وہی مسلسل بیچ ہمارے ایک مسافت کی دوری

ویسے ہر اک موڑ پہ رک کے اس نے ہم کو دی آواز

زیر لب کچھ مانگ رہے تھے سب کشکول لیے جس سے

اس نے پھینکی میرے کاسے میں سب سے اونچی آواز

سوچ رہی ہوں نام پہ اپنے چونک کے پیچھے مڑتے ہوئے

وہم تھا میرا یا پھر سچ مچ تیری ہی وہ تھی آواز

گہری خاموشی میں بہتے بے آباد جزیروں سے

کس نے میرا نام پکارا کس نے مجھ کو دی آواز