Chandni Shab Thi Tumhari Yaad Ka Daftar Khula, Urdu Ghazal By Nasreen Syed

چاندنی شب تھی ۔۔۔۔۔۔۔۔۔ تمہاری یاد کا دفتر کُھلا

یوں کھلی زنبیل ۔۔۔۔۔۔۔۔۔۔۔۔ اک گنجینہِ گوہر کُھلا

جرعہ جرعہ، جستہ جستہ مجھ پہ وہ دل بر کُھلا

’’اس تکلف سے، کہ گویا بتکدے کا در کُھلا ‘‘

مار ڈالے گا ترا غم ۔۔۔۔۔۔۔۔ تھا گُماں پہلے مجھے

دل میں کتنی وسعتیں پنہاں ہیں ، غم پا کر کُھلا

پک کے آوے میں ریاضت کے ہوئی ہوں معتبر

میری مٹی میں جو نم تھا، چاک پر جا کر کُھلا

ہر ذرا سی بات پر آنکھیں چھلک جاتی ہیں کیوں

موج زن ہے موجہِ رقّت کہیں اندر ۔۔۔۔۔ کُھلا

مصلحت مالک کی ہر مشکل میں ہے گر دیکھیے

بند جب اک در ہوا ۔۔۔۔۔۔۔۔۔۔۔۔۔ در دوسرا بہتر کُھلا

ہے بہت نازک، اسے پابندیاں مرجھا نہ دیں

چھوڑ دیتی ہوں میں دل کو اس لیے اکثر کُھلا

گھر کے آئی ہیں گھٹائیں، زلف کیا بکھری تری

کیا پلک اٹھی ، سمندر کا کوئی منظر کُھلا

ہجر کوہم نے بہت ہی سہل سمجھا تھا ، مگر

جاں کنی سے ہے سوا یہ عرصہِ محشر، کُھلا

در بدر پھرتے رہے گو کاسہِ دل کو لیے

پر، پئے خیرات ہم پر کب کسی کا در کُھلا

کون ہے جس کی حیا پر، خود حیا کو ناز ہے

دیکھتا ہے آسماں حسرت سے کس کا سر کُھلا

ہم نہ ہوں گے جب، کسی سر پر یہ چھت سایہ کرے

چھوڑ آئے ہیں وطن میں اس لیے بھی گھر کُھلا

بند کر کے آنکھ ، یوں نسریںؔ نہیں کرتے یقیں

دے رہا ناں ہو کہیں ۔۔۔۔ دھوکہ تمہیں رہبر کُھلا