Sans Chalti Rahe Dil Dharakta Rahe Tan Badan Main Lahu Ki Rawani Rahe, Urdu Ghazal By Nasreen Syed

سانس چلتی رہے، دل دھڑکتا رہے، تن بدن میں لہو کی روانی رہے

میرے دل پر، ترے عشق کی جب تلک حکمرانی رہے، مہر بانی رہے

ہو میسر جو شاہی جہاں کی تو کیا، گر محبت کی حلقہ بگوشی نہیں

عمر ہوتی ہے گر رائیگاں عشق میں، حاصلِ عمر یہ رائیگانی رہے

سر پہ دائم صنوبر ہو سایہ فگن، میرا آنگن رہے یونہی صحنِ چمن

دن کو سوسن کی کلیاں چٹکتی رہیں، شب کو مہکی ہوئی رات رانی رہے

اور اس کے سوا کچھ طلب ہے کہاں، تیرا دل ہو فقط میری جائے اماں

تیرے بازو حصارِ حفاظت بنیں ، تیری آنکھوں کی بس پاسبانی رہے

استطاعت کہاں، میری اوقات کیا، مالکِ کُن کا ہے سر پہ دستِ عطا

میرے کاسے میں حرفوں کے موتی رہیں اور تشکر کا آنکھوں میں پانی رہے

جب تخیل کے ساگر سے موتی ملیں، پُھول لفظوں کے جب بھی مہکنے لگیں

تب معطر فضائے سخن کیجیے، تب تکلم کی گوہر فشانی رہے

سینچیئے خونِ دل سے یہ کشتِ ہنر، شعر پہنچے گا نسرین تب دل تلک

صرف لفظوں سے ممکن نہیں معجزہ، کوئی رمزِ سخن، نکتہ دانی رہے