Ussi Ne Ju Tha Jevaan Ka Ujala Phonk Dala Hai, Urdu Ghazal By Nasreen Syed

اُسی نے، جو تھا جیون کا اُجالا، پھونک ڈالا ہے

پلایا عشق آتش کا وہ پیالہ ۔۔۔۔۔۔۔۔ پھونک ڈالا ہے

جلال ایسا تھا جلوے میں ترے، تن راکھ ہونا تھا

مرے صاحب، اے میرے ذی جلالہ، پھونک ڈالا ہے

اسے معلوم تھا، لہجے کی تلخی ، ہے فنا میری

سو اس نے لفظ انگارے میں ڈھالا، پھونک ڈالا ہے

بچی ہے راکھ ہی باقی تعارف میں ۔۔۔۔۔۔ محبت کا

الاؤ تھا مرا پہلے حوالہ ۔۔۔۔۔۔۔۔۔۔۔۔ پھونک ڈالا ہے

دہکتا ہے ترا ہر لمس اب ۔۔۔۔۔۔ انگار کی صورت

ترا بوسہ ، ہوا ماتھے کا چھالا ، پھونک ڈالا ہے

زمانے بھر کی تلخی ڈال دی اس نے پیالے میں

بھرا یوں آگ سے ساغر، اُچھالا، پھونک ڈالا ہے

ہمیں تو رزق ہونا تھا ۔۔۔۔۔ وصالِ روح پرور کا

بنایا ہجر نے ایسے نوالہ ۔۔۔۔۔۔۔ پھونک ڈالا ہے

مبارک ہو تجھے نسریںؔ ، مسیحائی مسیحا کی

کیا ہر اک ستم کا یوں ازالہ ، پھونک ڈالا ہے