Chal Diya Phir Na GahaN Afsos MaiN, Urdu Ghazal By Naveed Sadiq

چل دیا پھر ناگہاں، افسوس مَیں

تھا یہاں بھی رائیگاں، افسوس مَیں

کوئی کچھ کہتا پھرے میں تھا، نہ تھا

اپنے اندر تھا میاں، افسوس مَیں

اور کوئی دن، مگر اے خوش گماں!

ہوں بہت ہی بے اماں، افسوس مَیں

اک انوکھا تجربہ یہ زندگی

ایک جھلمل کا سماں، افسوس مَیں

رات دن ہر ایک پل بس تُو ہی تُو

مَیں بھی تھا، پر اب کہاں، افسوس مَیں

کائنات! اے کائنات! افسوس تُو

گم رہاں! اے گم رہاں! افسوس مَیں

تخلیہ، اے شہر! اے میرے رقیب!

جل رہا ہے آشیاں، افسوس مَیں

لَوٹنا ممکن نہ تھا، مَیں آ گیا

اے زمیں! اے آسماں! افسوس مَیں

دن ڈھلے یہ ہاؤ ہُو، یوں سُو بہ سُو

اے دیارِ گم رہاں! افسوس مَیں

صرف کہہ دینا کوئی مشکل نہیں

مَیں یہاں تھا، مَیں وہاں، افسوس مَیں

کچھ تھکے ہارے ارادے اور تُو

کچھ اجڑتی بستیاں، افسوس مَیں

مَیں ہی مَیں ہوں اپنے اندر چار سُو

اور یہ لب تشنگاں، افسوس مَیں

وہ گلی، وہ جانی پہچانی گلی

ہو گئی اِک داستاں، افسوس مَیں

تجھ سے آگے کی کوئی تمثیل ہوں

اے صدائے رائیگاں! افسوس مَیں

اپنی حیرت میں کہیں گم ہو گیا

اپنے ہونے کا زیاں، افسوس مَیں

کچھ نہ تھا تو کم سے کم مَیں تھا کہیں

اے خدائے ہر زماں، افسوس مَیں

وہ جو ممکن تھا، وہ ناممکن ہوا

دیدنی ہے یہ جہاں، افسوس مَیں

تم نہ سمجھو گے، نوید اس سال بھی

تھا بہت ہی بے اماں، افسوس مَیں