Ek Kaneez E Khas, Urdu Nazam By Nusrat Zehra

تو اک کنیزِ خاص ہے

تو اک کنیزِ خاص

بخشا گیا ازل سے ترے خواب کو عذاب

بانٹی گئی ہے نیند تجھے جاگتی ہوئی

تیری سبھی دُعائیں سدا ناقبول ہیں

تیری کسی صدا میں کشش ثقل نہیں

تیری جبیں پہ لکھا گیا ہے یہی نصاب

تو مانگ نہ کسی سے کبھی بھی کوئی صلہ

یہ حق تو وہ ہے جو تجھے بخشا نہیں گیا

اور یاد رکھ کہ ہاں کے سوا اسم نہ ہو یاد

جو ناخدا نے سوچ لیا فیصلہ وہ ہے

تیری جبیں جھکی رہے اور خواب سرنگوں

آقا کے لب سے نکلی ہوئی موت مرحبا

آ تھام لے انہی کو یہی ہے تری حیات

یہ کس کے بطن سے اب خواب لے رہا ہے جنم

تمام پیرہن اس کے لئے ہوئے ہیں کفن

قریبِ مرگ ہوا ہے میری دعا کا چمن

صلیبِ وقت نے یہ کر دیا ہے کیسا ستم

کلیدِ زیست کے ہاتھوں میں کوئی پھول نہیں

سزا ملی ہے کہ اب خواب کی تو دھول نہیں

قرار دادِ وفا کا کوئی اصول نہیں