Najeeb, Urdu Nazam By Nusrat Zehra

تجھ کو آباء سے ورثے میں صحرا ملا۔۔۔۔

وہ جہاں کہ نبی اور سبط نبی کا بسیرا رہا۔۔۔۔

ہر خطاکار سے درگزر جن کا شیوہ رہا۔۔۔۔

سنگ باری بھی دنیا نے روکی نہ تھی۔۔۔۔

پھر بھی حرفِ دعا تھا کہ جاری رہا۔۔۔۔

اس قبیلے کا احساس وہ بیبیاں۔۔۔۔

بے پناہی میں دکھ بٹاتی رہیں۔۔۔۔

اپنے بالوں سے چہرے چھپاتی رہیں۔۔۔۔

حلقہ ء دشمناں میں لہو کے دئیے۔۔۔۔

دشت میں روشنی بن کے چھاتی رہیں۔۔۔۔

حق و باطل کو ہم پر عیاں کر دیا۔۔۔۔

یہ سفر ہے مدینے سے مہران کا۔۔۔۔

یہ ہے دھرتی کا سب سے سلگتا دیا۔۔۔۔

سبز موسم کے خوابوں کا حصہ تھا جو۔۔۔۔

زہر پی پی کے بھی بے نمو ہی رہا۔۔۔۔

بے گھری کی گھنیری سیاہی کے بعد۔۔۔۔

ہم کو پچیس بہاروں کا آنگن ملا۔۔۔۔

جیسے تیری جبیں سے سویرا ہوا۔۔۔۔

ساعت بے ردائی کی وحشت کے بعد۔۔۔۔

تو نے اپنی شجاعت کا سایہ کیا۔۔۔۔

یوں لگا جیسے جینے کا ہم کو ٹھکانہ ملا۔۔۔۔

ابھی صبح جوبن پہ آئی ہی تھی۔۔۔۔

آندھیوں کو نجانے یہ کیا ہو گیا۔۔۔۔

اس سفینے کو جیسے ڈبو ہی دیا۔۔۔۔

اپنے دل کا نگر اک کھنڈر بن گیا۔۔۔۔

پھر تو ہر اک زباں پر یہی تھی صدا۔۔۔۔

اب کہاں ہو گا ایسا جری نوجواں۔۔۔۔

صبحِ صادق کا چہرہ تو اترا ہی تھا۔۔۔۔

پورے چاندوں پہ بھی شب کا پہرہ ہوا۔۔۔۔

پھر تو ہر راہ رہزن کی جاء بن گئی۔۔۔۔

پھر نہ رستہ کوئی بھی سجھائی دیا۔۔۔۔

دور تک زندگی میں اندھیرا ہوا،اور اندھیرا ہوا،اور اندھیرا۔۔۔۔