Aaj Ki Raat, Urdu Nazam By Professor Rasheed Hasrat

آج کی رات میں نے سوچا ھے

زِیست کو اِک عذاب لِکھ لُوں گا

زخم، دُکھ، اِضطراب لِکھ لُوں گا

 میری آنکھیں فریب کھا ہی چُکِیں

پِھر سماعت نے زخم پائے ہیں

زِیست کے مرحلوں میں تنہا ھُوں

اور تنہا سِسک کے روتا ھوں

آج کی رات میں نے سوچا ھے

اِک قیامت سی مُجھ پہ بِیت گئی

رات بھر سوچتا رہا دِل میں

یا اِلہی یہ زخم کیسا ھے

کیوں مُسلسل عذاب دیتا ھے

اِک کڑے اِمتحاں سے گُزرا ھُوں

یُوں سمجھ لے کہ جاں سے گُزرا ھوں

زِیست کی طرح مُنتشِر سوچیں

آج کی رات میں نے سوچا ھے

جب سے لوٹا ھوں آج دفتر سے

زہر کے گھونٹ پی کے زندہ ھوں

اپنی تنہائیوں کا ماتم ھے۔

بارہا دِل میں ٹِیس اُٹھتی ھے

کِس کے دامن سے اشک پُونچُھوں گا

کِس کو قِصّے سُنا کے رو لُوں گا

آج کی رات میں نے سوچا ھے

پاس عُہدہ نہِیں نہ سرمایہ

اور سِکّوں کی نہ ہی جھنکاریں

میں کِسی دِل کو کیسے بھا جاؤں؟

کیا کِسی آنکھ میں سما جاؤں؟

ہر طرف سِیم و زر کا چرچا ھے

دِل کو ہر وقت ایک کھٹکتا ھے

یہ محبت عجِیب فِتنہ ھے

آج کی رات میں نے سوچا ھے

میں نے اپنا سمجھ لیا تھا جِسے

وہ کِسی اور کی امانت ھے

پُھول ھے وہ کِسی کے کالر کا

میرا اُس سے بھلا ھے رِشتہ کیا

آج حسرتؔ مُجھے یہ کہنے دو

اشک جو بہہ رہے ہیں بہنے دو

دُکھ، جفا، اِضطراب سہنے دو

آج کی رات میں نے سوچا ھے