Ghanoodgi, Urdu Nazam By Qandeel Badar

زمین کیوں کر

یوں اپنے محورسے تِپکا تِپکا سِرک رہی ہے

خلا میں نیلے بگولے بن کر فلک کی جانب کیوں اٹھ رہے ہیں

کیوں لال ،پیلی ،عنابی پریاں گلابی جھولوں میں جھولتی ہیں

یہ ٹھنڈے سورج نے گم فضا کو کیوں اپنی بانہوں میں بھر لیا ہے

یہ گول پہیہ نہ جانے کیسے عجیب سازوں پہ ناچتا ہے

کیوں کہکشاؤں میں کوئی چھپ کر ستار ایسے بجا رہا ہے

سمندروں کی لہک لہک پر جو راگ لکھ کر سنا رہا ہے

دھواں دھواں ہے

یہ کیا نشہ ہے

جوقطرہ قطرہ ٹپک رہا ہے

کہ چپ غنودہ سی شب میں کوئی ہزار قصے سنا رہا ہے

ہزار جگنو نچا رہا ہے

یہ تم ہو بھیتر؟

کہ جس نے آکر

تمام منظر بدل دیا ہے

مِرے نفس کے تمام دھاگوں میں ساز کیسا یہ جڑ دیا ہے

مِرے بدن کے تمام ذروں میں عطر کیسا یہ بھر دیا ہے

یہ کس بنارس کے گھاٹ پر ہوں

کیوں بے وجہ ہی دیے جلا کر مَیں بہتے پانی پہ رکھ رہی ہوں

یہ ذائقہ سا جو چکھ رہی ہوں

نیا نیا ہے

یہ واہمہ ہے ؟

کوئی خد ا ہے

جو کہہ رہا ہے

عظیم شاعر کی شاعری میں

مفہوم ’عنقا‘ نہیں رہا ہے