Burada Ur Raha Hai, Urdu Nazam By Rafiq Sandeelvi

Burada Ur Raha Hai is a famous Urdu Nazam written by a famous poet, Rafiq Sandeelvi. Burada Ur Raha Hai comes under the Sad category of Urdu Nazam. You can read Burada Ur Raha Hai on this page of UrduPoint.

بُرادہ اڑ رہا ہے

رفیق سندیلوی

رادہ اڑ رہا ہے

ترمرے سے ناچتے ہیں

دیدۂ نمناک میں

براق سائے رینگتے ہیں

راہداری میں

برادہ اڑ رہا ہے

ناک کے نتھنے میں

نلکی آکسیجن کی لگی ہے

گوشۂ لب رال سے لتھڑا ہے

ہچکی سی بندھی ہے

اک غشی ہے

میرا حاضر میرے غائب سے جدا ہے

کیا بتاؤں ماجرا کیا ہے!

زمانوں قبل ہم دونوں کا رستہ

پوٹلی میں ماں کے ہاتھوں کا پکا کھانا

کتابیں اور بستہ ایک تھے

کڑیوں کے رخنوں میں

ہمارے ساتھ چڑیاں

رات دن بسرام کرتی تھیں

ہماری مشترک چہکار تھی

درزی سے کپڑے ایک جیسے سل کے آتے

ایک سے جوتے پہنتے

بوندا باندی میں اکٹھے ہی نہاتے

ہم جدھر جاتے ہمیشہ ساتھ جاتے

رات جب ڈھلتی

تو سنتے تھے کہانی

صحن میں رکھے ہوئے مٹکے کا پانی

پیڑ کی چھتری

ستاروں سے مزین آسماں

ہانڈی کی خوشبو

اور وریدوں کا لہو

المختصر خوابوں کی دنیا ایک تھی

اک دوسرے کا حاضر و غائب تھے

ہم جڑواں تھے

اعضا و عناصر میں دوئی ناپید تھی

سینے سے سینہ

دل سے دل

ماتھے سے ماتھا منسلک تھا!

کیا بتاؤں

کس طرح بجلی لپک کر تار سے نکلی

کنارے اپنا دریا چھوڑ کر رخصت ہوئے

تکلے کا دھاگا کس طرح ٹوٹا

سرہانے خواب جو رکھے تھے

کب بدلے گئے

زینہ کدھر کو مڑ گیا

وہ کون سا ساماں تھا

جس کے پھینکنے پر

دل تو راضی تھا

مگر جس کے اٹھانے سے کمر دکھتی نہ تھی

کس درد کی پرچھائیں تھی

جو مظہر و شے سے نکلنا چاہتی تھی

دھند جو دیوار کے دونوں طرف تھی

اس کا قصہ کیا سناؤں!

کیا بتاؤں

وقت نے جب تختۂ آہن پہ رکھ کر

تیز رو آرا چلایا تھا

ہمیں ٹکڑوں میں کاٹا تھا

اسی دن سے برادہ اڑ رہا ہے

پیڑ کے سوکھے تنے سے

چھت کی کڑیوں سے

کتابوں اور خوابوں سے

برادہ اڑ رہا ہے

میرا حاضر میرے غائب سے جدا ہے!!

رفیق سندیلوی

© UrduPoint.com

All Rights Reserved

(1565) ووٹ وصول ہوئے

You can read Burada Ur Raha Hai written by Rafiq Sandeelvi at UrduPoint. Burada Ur Raha Hai is one of the masterpieces written by Rafiq Sandeelvi. You can also find the complete poetry collection of Rafiq Sandeelvi by clicking on the button 'Read Complete Poetry Collection of Rafiq Sandeelvi' above.

Burada Ur Raha Hai is a widely read Urdu Nazam. If you like Burada Ur Raha Hai, you will also like to read other famous Urdu Nazam.

You can also read Sad Poetry, If you want to read more poems. We hope you will like the vast collection of poetry at UrduPoint; remember to share it with others.