Tum, Urdu Nazam By Rehman Faris

تُم مری آگ ھو !

‏‎جس کو پل پل میں رکھتا ھُوں روشن

‏‎محبت کی مشعل سے

‏‎اور اپنی سانسوں کے ایندھن سے

‏‎اور اس کے شعلوں سے کلیاں بناتا ھُوں

‏‎سُرخ اور سبز اور جادو بھری

‏‎جن کی چنگاریوں سے جُڑی ھیں مری دھڑکنیں ! جانِ جاں !

‏‎تم مری آگ ھو !

‏‎تُم مری جھیل ھو !

‏‎جس کے نیلے کناروں کی حد سے پرے

‏‎روز اُڑ کر پہنچتا ھوں

‏‎گُم سُم پرندوں کےمانند

‏‎اور گھنٹوں پاؤں ڈبوئے تمہارے ھرے پانیوں میں

‏‎مَیں شاداب رھتا ھوں

‏‎سیراب رھتا ھوں، جانِ جہاں !

‏‎تُم میری جھیل ھو !

تم مری خاک ھو !

جس سے گوندھا گیا

‏‎میرے تن من کو

‏‎اور پھر بنائے گئے میرے سب خال و خد

‏‎میرا ھونا تمہاری عطا ھے

‏‎اگر تم نہ ھوتی

‏‎تو بے شکل ھوتا مَیں، بے نام ھوتا

‏‎مری جانِ جاں !

‏‎تم مری خاک ھو !

تم مہکتی لہکتی ھوا ھو مری !

جس کے انگلی پکڑ کر مَیں بے نام جنگل میں پھرتا ھوں

اور لوٹتا ھی نہیں

جس کی خوشبو سے پُر ھیں مری سانس کے سب دیے

میرا ھر سانس تحفہ تمہارے لیے !

کفر کی تہمتوں کو ذرا بھول کر

کیوں نہ کہہ دُوں کہ ھاں تُم خدا ھو مری

تم مہکتی لہکتی ھوا ھو مری !