Manzar Ki Oot Main, Urdu Nazam By Safia Hayat

بچے کو سینے سے لگائے

ھوا میں کچھ کھوجتی

وہ منظر سے پس منظر میں چلی جاتی ھے۔

جہاں اک پھولے فراک میں ننھی سی لڑکی

تتلی کے رنگوں سے

غنودگی میں بسی

کالی چٹی دنیا میں رنگ بھرتی ھے۔

رنگوں سے اکتا کر

ادھر ادھر بھاگتے لفظوں کو

روشنائی میں نہلاتی

سفید بستر پہ سلاتی

نظموں کے جگنووءں کی دموں میں روشنی بھرتی

صندلی دھوپ کو

سبک روی سے چلتے پانی میں ڈبوتی

دن بھر کے تھکے سورج کو آنکھوں میں بھر لیتی ھے۔

اچانک ھی

سامنے کا منظر انگڑائی لیتا ھے

دل میں بھاگتا لہو

منجمد ھوتا ھے۔

اسکے کانوں میں جملے سیسہ پگھلاتے ہیں۔

"یہ عورت ھے۔

اسکی سانسیں شمار کرتے رہو۔

اسے ایک بھی سانس ادھار مت دو۔

اسکی کوکھ اپنے کیڑوں سے آباد رکھو۔

جھوٹی محبتی تسلیوں کی آغوش میں سلائے رکھو۔

اسکی بیداری

ھماری طاقت کچل دے گی۔"

آستین میں پلتا سانپ

اسکے بدن پہ رینگنے لگا۔

عورت ممتا کے زیر اثر

زہر پیتی نیل و نیل ھو گئی