Adrak, Urdu Nazam By Safia Hayat

جب بھی تتلیوں کے پر وں پر

کچے رنگ اتار کر پکے رنگ کئے

تتلیاں مرنے لگیں۔

چیو نٹیوں کی رفتار ناپنے کی کوشش کی

تووہ رینگنے لگیں۔

طوطوں نے بریڈنگ سیزن بدل لیا

جب ان پہ نظر رکھی گئی۔

شبنم کے قطروں میں زیست ڈھونڈی

تو اسے لہکتے پتوں میں چھپتے دیکھا۔

موسموں نے اپنی شناخت

ھماری یاداشت میں چھپادی۔

بالکل ایسے ہی جیسے

ھم سرما کے کوٹ میں ململ کا دوپٹہ چھپا دیں۔

ٹرنکوں میں رکھے خاص کپڑوں کی تلاشی لی گئ

تو برساتی کیڑوں کے انڈے برآمد ھوئے۔

پرانی شراب میں نشے کا خمار

وہاں پلنے والی سونڈیوں کی پشت میں ملا۔

بارشوں پہ نظر رکھی گئ تو

وہ حبس گھڑیوں میں سوئی ملی۔

ہمیشہ سے یہی ھوا۔

جب کچھ بھی تمام ھونے کو ھوتا

کچھ عجیب ھی ھوا۔

اب آنکھوں نے

کسی بھی منظر کو

دیکھنے سے انکار کر دیا ھے۔

بیزاری پلتے پلتے

انسانی خلیوں میں سانڈ بن کر

زندگی کوھڑپ کرتے

کمینے جرثوموں کو پیدا کرنے لگی ھے۔

کیمیائی عمل تیز ھونے سے

بچے پیدا ھوتے ھی بوڑھے ھو جاتے ہیں۔

جوان ابلتا خون

انسانی مارکیٹ میں دستیاب نہیں ھے