Borhe Darakhatoon Ka Pindaal, Urdu Nazam By Safia Hayat

میری گمشدگی پہ

رو مت دینا

میں نے نظم لکھ کے

چائے کے کپ کے نیچے رکھ دی ھے

اور اسکی آخری لائنوں میں سب کچھ لکھ دیا ھے۔

مجھے اب کچھ دکھائی نہیں دیتا

سنائی بھی نہیں دیتا۔

لفظوں کی چیخ میرے کانوں پہ

اثر انداز نہیں ھوتی

انکے تاثرات

اب میری آنکھوں کی رونق نہیں بنتے

مگر تم شاید نہیں سمجھو گے

تم نے سمجھا ھی کب تھا۔

تم تو کتابوں کی اوٹ میں رھتے ھو۔

مجھے لفظ سمجھ کر

کتاب کی پٹاری میں بند کر دیتے

اور جب چاھتے

اپنی تحریر کی بین بجا کر نکالتے

اور۔۔۔۔۔۔۔۔۔۔

دل بہل جانے کے بعد

پھر کتاب کی پٹاری میں بند کر دیتے

تم جو میری کروٹ کے رازداں تھے۔

میری سوچیں جب تمھارے مدار میں الجھ جاتی ہیں۔

تو میں جنگلوں میں درختوں کی چھال

رنگنے اور صاف کرنےمیں جت جاتی ھوں

جب تمھارا ماتھا نہ ملتا

تو میں

درختوں کے تنوں پہ نظمیں لکھنے لگتی ھوں

شام کو بوڑھے درخت پنڈال سجاتے

سروں پہ گرے وگ سجائےمیری نظمیں سنتے

اور ایک دوسرے کوحیرانگی سے دیکھتے

صرف " ھوں " کہتے ہیں

میں اب انسان بنے درختوں میں

نظم لینے جاتی ھوں