Glass Main Pari Piyas Ka Ghont, Urdu Nazam By Safia Hayat

پو ماگھ کی راتیں

چولہے میں چنگاری تک سرد کر دیتی ہیں

لکڑی تو جنگل نے ویسے ہی اسے

دینے سے انکار کر رکھا تھا۔

وہ صبح سے رات گئے

بچوں کے جوتے سیدھے کرتے کرتے

تھکی تھکی سی نیند کی سلائی

آنکھوں میں پھیرنے کو تھی۔

مجازی آواز میں طلب لپکی۔

وہ نیند کو ڈریسنگ ٹیبل پہ رکھ کر

گلاس میں پڑی پیاس کا گھونٹ بن گئ۔

پیتل کی بالٹی میں رات بھر کا برف بنتا پانی

اسکے بدن کے چیتھڑوں پہ زخموں کے کھرنڈ اتارتا

آگ لگاتا رہا۔

پو ماگھ کی دھند میں لپٹی ماتمی شب

رگ رگ کو منجمد کر نے لگی۔

بالوں سے ٹپکتی بوندیں

اسےکمر تک بھگونے لگیں۔

وہ ٹھٹھرتی کپکپاتی ننگے پاوءں

چھت پہ دھند کو ٹھوکر مارتی رہی۔

لڑکتی یخ بستہ نصیبوں پہ دلگیر

تاریکیوں سے لڑتی رہی۔

وہ زرد پتوں پہ لکھے بیمار مقدر کو

قتل کرنا چاھتی ھے۔

کسی دیس جانا چاھتی ھے۔

مگر

بندر گاہوں پہ کھڑے جہازوں نے

چلنے سے انکار کر دیا

تو ۔۔۔۔۔۔

اس نے اگلی پو ماگھ کی

غسل کرتی راتوں میں

چائے کے ساتھ

بیرونی ملک سے منگوایا

آعلی زہر کا انتخاب کیا ھے۔

وہ ایک ہی گھونٹ میں

جہاز کی سب سے پہلی سیٹ پہ

بیٹھنا چاھتی ھے