Hamari Khudai Mana Hai, Urdu Nazam By Safia Hayat

ھم اپنے بہت اندر

کہیں گہری کھائی میں جا گرتے ھیں۔

ھمارے جسموں کی کھدائی منع ھے۔

کیونکہ کھدائی کرنے پہ

ڈھونڈنے والے

وہ ڈھوند نہیں پائیں گے ۔

جو انھیں چاھئے ھو گا۔

ھم وہ سب سے نچلی تہہ میں چھپا کر رکھتے ہیں۔

روشنی بھی اسکے تعاقب میں ہار جاتی ھے۔

ھمارامد مقابل ھمارے ہنسنے اور رونے کو دیکھ کر مطمئن ھو جاتا ھے۔

گہری کھائی کا وہ بھید کبھی نہیں کھلتا۔

ھم بل کھائی رسیوں کی طرح اندر سے رویوں کی گھنجلوں میں

دکھ اور سکھ تلاش کرتے مارے مارے پھرتے ہیں۔

کسی کا بھی کندھا ساتھ نہیں دیتا۔

ماتھے سے ماتھا ٹکاتے

پیر سے پیر ملاتے بھی

ھم اپنی اپنی غلام گردشوں میں بھٹکتے ہیں۔

وہ اندھے بہرے لوگ ہیں

جو ایک آسماں اور زمیں تلاشتے

نارسائیوں کے انبار تلے دب جاتے ہیں۔

ھم بار بار موت نگلتے

زیست اگلتے ہیں۔

بے شمار نطفے مٹی میں

بے چینی کے ھاتھوں پھدکتے ہیں۔

ھم چند پلوں کی تسکین کا خمیر تیار کرتے

کچھ بے اعتباررشتوں کو جنم دے کر

دن رات تابوتو ں کی تیاری میں کھب جاتے ہیں۔

سینے میں پھیلتے سکڑتے غبارے میں

آخری ھوا بھرتے

دل میں چھپے بھید کے ساتھ لپٹ کر روتے ہیں۔

نہ کچھ پایا نہ کچھ کھویا

ایویں ذات کا جنجل پالا۔

کھدی مٹی میں تابوت رکھ کر

ھمارے نطفے لوٹ جاتے ہیں۔

ھمارے آنسو کوئی نہیں پونچھتا۔

ھم تنہا روتے

تنہائی کی گود سو جاتے ہیں