Kiyon Ka Shor, Urdu Nazam By Safia Hayat

ہماری کہانی عجیب ہے

کوکھ سے

دنیا کے تہہ خانے میں

دھکیل دیا جاتا ہے

طے شدہ وقت اور مقام کے مطابق

کوئی دل کی خوشی نہیں پوچھتا

حسرتیں دکھ بن جاتی ہیں۔

بہتر ہے

جنم لینے سے پہلے آزادی کی تحریک چلائی جائے

اےاسیران قفس سنو!

جوھڑ میں خود کشی بہتر ہے

ہمارا جینا مرنا جبری ہے

جب جینا ھوتا ہے

مار دیا جاتا ہے

مدر لینڈ کوکھ کی بھی چوائس نہیں

کنفیوزن جراثیم کی داڑھی اگنے لگی ہے

غیر ضروری بال کل جلسے میں خوب چیخے

ہماری فصل کی کٹائی کو

ثواب کے پلڑے میں رکھ کر

ذلیل کیا جاتا ہے

کیوں آخر کیوں۔؟

اسے اپنا تخت گرتا محسوس ھوا

جب کیوں کی تعداد بڑھنے لگی

مذاہب نے ایکا کر لیا

کہ اب بھاگا جائے