Nazm Se Khali Din, Urdu Nazam By Safia Hayat

آخری گھڑیاں یہ سوچنے میں گزار دیں۔

صبح نظم لکھوں

یا رہنے دوں۔

نہیں (آواز کہتی ھے)

پہلے کپڑے دھونا

گھر کے کونوں کھدروں میں دبکی مٹی ھٹانا

ادھڑی قمیضوں کو سینا

رسوئی کے بکھیڑے کو دیکھنا

بچوں کے فیڈر ،بستے

جوتے ،موزے،تولئے صابن سنبھالنا

نظم کہتی ھے۔

یہ سب رھنے دو

تم بس لکھو

نہیں (آواز پھر بولی)

"تم عورت ھو۔

بھلی مانس پہلے اپنے مرد کے کام کرو

ورنہ

جہنمی آگ کا لقمہ بنو گی۔

سوچ آدھوری نظم کا سوت کاتتی ھے۔

وقت عشائیہ جمائی لیتا ھے۔

بے چاری

ناشتے کی رکابیاں الماری میں رکھتے

سہ پہر کی چائے کے کپ اٹھاتے

تھکی تھکی سی

دال چاول چولہے پہ چڑھاتی

پستان چوستی ننھی کو سلاتی

نظم کے سروں کو ملاتی کانپ جاتی ھے۔

جب حقارت سے ادا کردہ

جملہ سماعت کو چھیدتا ھے

"نکمی سی عورت ھو

ڈھنگ سے کچھ نہیں کرتی"

یوں

ادھوری نظم

کھاٹ پہ پڑی مر جاتی ھے