Wadi E Neelum K Shohda K Naam, Urdu Nazam By Safia Hayat

اے وادیء نیلم کے بوسیدہ پل!

تم نے انسانی خصلت کہاں سے لی

شاید تعمیر ہوتے

تم بھاری بھرکم بوٹوں سے

یا سائن کرتے ہاتھوں سے

نہیں ضرور تم نے فوٹو سیشن کرواتے

کیمروں کی فلیش لائٹ سے سیکھا

سنو دریائے نیلم کی کمر پہ ہاتھ رکھے

پھلاحی اور دیودار کی کرلاتی نمی

میری ماں تمہیں دعا نہیں دے گی

تم انسان جیسے گونگے بہرے ہو گئے

کوکتی کوئل !

تمھاری کو کو چھن جائے

جیسے نیلم میں اچھلتی کودتی جھاگ نے

مجھے میری ماں سے چھینا

تم چیخ دیتی

وقت خطا کھاتا

منحوس لمحوں کی چاپ تھم جاتی

میں پانی کی لہروں کے ظلم سے بچ جاتا

سنو ! اے کٹھور کہنہ دریا

تم ذائقہ بدلنے کی خاطر

اب کی بار ایسا کرنا

وردی ، بوٹوں ، اورجھنڈے والی گاڑی کے سپوتوں کو گود لینا

پھر شاید

محنت کش ماں کی چھاتیوں پہ پلے لعل ھجرت نہ کریں۔

جوان لہو سے قندیل جلانے والو!

ماوءوں کے پیروں میں آگ باندھنے والو!

بوسیدہ پل گرا دو