Izhar E Mohabbat Aik Pahari Silsila Hai, Urdu Nazam By Salman Basit

اسے بس ایک ہی ضد ہے

میں اس کی ذات سے منسوب

اپنے سب خیالوں کا کوئی پیکر تراشوں

اور اس کے سامنے رکھ دوں

اسے بتلاؤں میں اس سے مجھے کتنی محبت ہے

اسے کیسے بتاؤں میں

زمیں سے آسماں تک اس محیطِ بیکراں کو

اپنی مٹھّی میں جکڑنا میرے بس میں ہی نہیں ہے

مرے سر پر چمکتے مہرباں سورج کی کرنوں کا

کوئی بھی گوشوارہ بن نہیں سکتا

زمیں کی گود میں کتنے سمند ر ہیں

کناروں پر نمیدہ ریت کے ذرّات ہیں

میں ان کو ایک عد دی دسترس میں کس طرح کر لوں

بھلا میں لا مکاں کی وسعتوں کو

اس مکاں میں کس طرح لاؤں

جو قد رت نے ہمیشہ ان کہا رکھا ہے

اس کو کس طرح کہ دوں

کہ تتلی کو پکڑ لینے کا،

خوشبو کو جکڑ لینے کا

فن مجھ کو نہیں آتا

اسے کیسے بتا ؤں میں

کہ اظہارِمحبت اک پہاڑی راستہ ہے

اور چوٹی تک پہنچنے کا مجھے گر ہی نہیں آتا