Dou Tok, Urdu Nazam By Shaukat Jamal

شادی کے چند روز تو چھیڑی نہ کوئی بات

حائل ہمارے بیچ رہے کچھ تکلفات

پھر ایک دن جو ان سے مری گفتگو ہوئی

دو ٹوک بات چیت ہوئی دو بدو ہوئی

پوچھا کہ ناشتے کا کوئی انتظام ہے

بولیں مجھے پتا ہو تو مجھ پر حرام ہے

میں نے کہا کہ چائے کی پیالی عطا کریں

کہنے لگیں کہ بات نہ ایسی کیا کریں

میں نے کہا چلیں ذرا انڈا ابال دیں

بولیں مجھے نہ آپ یہ کار محال دیں

پوچھا کہ جانتی تو ہیں چاول ابالنا

بولیں بلا اب اپنی مرے سر نہ ڈالنا

میں نے کہا کہ ہے کوئی روٹی کا آسرا

بولیں کھلے ہوئے تو ہیں تندور جا بجا

میں نے کہا کہ گوشت پکانے کی تاب ہے

بولیں کی ٹن کے پیک میں سب دستیاب ہے

میں نے کہا کہ دال یا سبزی بنائیے

کہنے لگیں خیال یہ دل سے نکالیے

میں نے کہا کہ کھانا پکانا ہے زندگی

بولیں کہ جو پکے اسے کھانا ہے زندگی

آپس میں فیصلہ کوئی کرنا تھا ہم کو آج

پوچھا کرے گا کون بھلا گھر کا کام کاج

بولیں کہ کام کرنے کی خوگر نہیں ہوں میں

بیوی ہوں آپ کی کوئی شوہر نہیں ہوں میں