Bain Us Satoor, Urdu Nazam By Sheba Taraz

سنو شاعر !

تمہارے حرف کی گہرائی میں جو درد جاگا ہے

مجھے سونے نہیں دیتا،

بہت گھمبیرتا ہے تانے بانے میں،

کئی صدیوں کا جوکھم کاٹ کر تاریخ آئی ہے

لبادے خون میں تر ہیں

بہت وحشی ہوئی جاتی ہیں آوازیں

مری آنکھوں میں سکتہ ہے

مری گویائی میں لُکنت۔

سنو شاعر!

تمہاری نظم کی پہلی پرت رومان پرور ہے

بظاہر پھول ہیں ، کھلیان ہیں اور چاندنی ہے

رقص کا ہنگام ہے ،

(بیکار ہے بیکار ہے سب کچھ)

مگر اُف

رفتہ رفتہ اضطرابی کیفیت محصور کرتی ہے،

ازل کے بیکراں آغاز سے بے انت آخر تک

فقط ظلم و ستم کی داستانیں ہیں

صلیبِ وقت پر کوئی کہیں بازو کٹاتا ہے

کوئی آنسو چڑھاتا ہے

کبھی آہ و بُکا بھی ہو نہیں پاتی،

کبھی اک قبر کی مٹی میں سوئے سینکڑوں آدم

نمو پاتے ہیں نعروں میں،

سفرکا رُخ پلٹتاہے

زمیں کروٹ بدلتی ہے

یہیں سے رنج زینے سے اتر کر

روح کی پاتال میں رستے بناتا ہے،

سمجھنا ہے یہاں مشکل۔۔۔

بہت گھمبیرتا ہے تانے بانے میں،

سنو شاعر!

تمہارے حرف کا جادو ہے یا تلوار چلتی ہے

سیہ آندھی زمانے کی نقابوں کو اُلٹتی ہے

بہت مکروہ چہرے ہیں

پسِ پردہ جو کاری وار کرتے ہیں،

دھواں سا پھیل جاتا ہے،

بہت مجبور ہو جاتی ہیں آنکھیں بھی

مگر۔۔۔ پلکوں کے سائے میں

تمہارا خواب سا چہرہ

مجھے رونے نہیں دیتا

تمہار ے حرف کی گہرائی میں جو درد جاگا ہے،

مجھے ۔۔۔ سونے نہیں دیتا ۔۔۔ !