Doozakh, Urdu Nazam By Sheba Taraz

حسیں منظر …

دعائیں دیتی مائیں …اور،

ابھرتا ڈوبتا سورج…

ہرے کھیتوں میں ہنستے ناچے

گاتے ہوئے ہوئے خوشے ،

درختوں کے گھنیرے سائے میں

بیٹھے ہوئے لڑکے ،

بھری گاکر لیے ، چھاگل لیے

چھپتی ہوئی ، چلتی ہوئی لڑکی،

کھنکتی چوڑیوں کو روکتی ، سہمی ہوئی لڑکی

کتابوں سے بھرے بستے ،

خوابوں سے بھری آنکھیں…

شرارت سے بھرے بچے!

کہیں مٹی کا سوندھا پن،

محبت میں مگن …دریا

اچھلتے کودتے چشمے

ندی کا منتظر …ساگر

چمکتے چاند سے بڑھ کر

لپٹتا …باؤلا بادل

حسیں منظر…حسیں منظر

کریہہ منظر…!

برستی گولیوں میں جان دیتے

نوجواں لڑکے

سلگتے کھیت، ٹوٹے پیڑ، بنجر بے زباں رستے

سسکتی زندگی اور سنسناتی گولیوں کی

زد میں کچھ بچے …

سیہ دھواں گرجتے توپ کے گولے

کٹے اجسام۔ ان پر بھنبھناتی

مکھیوں کے غول

ملبے میں دبی لاشیں

امن کی منتظر آنکھیں۔

لکیروں سے مٹے کچھ ہاتھ

لبوں پر اک ادھوری بات

یہ کس نے ایک لمحے میں

بدل ڈالا تصورکو

پلٹ ڈالا ہے منظر کو …