Nadi Humsafar Meri, Urdu Nazam By Sheba Taraz

تمہاری یاد میری زندگی کے ساتھ چلتی ہے

پہاڑی راستوں کے ساتھ

جیسے رقص کرتی ، جھومتی ، گاتی ہوئی ندی

کسی انجان سے اِک موڑ پراِک دم

نظر کے سامنے آئے

کسی لمبے سے ، بل کھاتے ہوئے رستے سے جیسے

دور ہو جائے

کہیں اِک تنگ درّے سے گزرتے

جھاگ اُڑاتی ہو ۔۔۔

کہیں میدان میں رستہ بنا کر پھیل سی جائے۔۔۔

۔۔۔ پہاڑی راستوں کا پھر سفر انجام ہوتا ہے

اچانک وقت کی گاڑی کے پہیے رُخ بدلتے ہیں

زمانے کی ٹریفک ، دھول میں رستہ بناتے ہیں

سبھی کچھ بھول جاتا ہے ‘

’ تمہاری یاد کی ہنستی ہوئی ، گاتی ہوئی ندی

کہیں ویران میدانوں میں سُستی سے رواں ہو گی ‘

تمہاری یاد کی ندی

پہاڑی راستوں کو یاد کرتی ہے

۔۔۔ تمہاری یاد ۔۔۔ میری زندگی کے ساتھ چلتی ہے ۔۔!