Darbadar Mujh Ko Wo Yaksar Nahi Hone Deta, Urdu By Tabassum Anwaar

در بدر مجھ کو وہ یکسر نہیں ہونے دیتا

دل مگر اپنا مرا گھر نہیں ہونے دیتا

ایک دنیا سے ہو ں بہتر یہ جتاتا ہے مجھے

خود سے لیکن کبھی برتر نہیں ہونے دیتا

مجھ کو اس پار کنارے نہیں آنے دیتے

اور غرقاب سمندر نہیں ہونے دیتا

کلمہ ء حسن کو خود گھول کے پی رکھا ہے

عشق آیت مجھے ازبر نہیں ہونے دیتا

آنے دیتا نہیں اندر کبھی اپنے دل کے

مجھ کو اوقات سے باہر نہیں ہونے دیتا

عا میا نہ ہے تخیل مرے کوزہ گر کا

میں جو چاہوں بھی تو ہٹ کر ۔ نہیں ہونے دیتا

کیسا گنبد ہے تغافل کا تجھے گھیر ے ہوئے

اپنی دیوار میں جو در نہیں ہونے دیتا

مجھکو گردش میں غم _ دہر گھمائے کہیں اور

تیری چوکھٹ مرا محور نہیں ہونے دیتا

پاس اس کے ہے خد و خال کا ایسا مخزن

کو ئ صورت بھی مکرر نہیں ہونے دیتا

دور رہ رہ کے جو چمکے ہے یقیں کا تارہ

رہ بھٹکنے کا مجھے ڈر نہیں ہونے دیتا

کام کچھ وہ ہیں تبسم جو مقدر میں نہیں

اور کچھ کام مقدر نہیں ہونے دیتا