Jalu Main Liye Aik Ghubar E Aziyat, Urdu Ghazal By Tabassum Anwaar

جلو میں لیئے اک غبارِ اذیت

چلی میں سرِ رہگزارِ اذیت

میں چلتی گئی خود بخود سمت اس کی

عجب پر کشش تھی پکارِ اذیت

اٹھا کر خوشی سے ۔ پڑھا میں نے کلمہ

رکھا دوش پر ایسے بارِ اذیت

جگر کی زمیں روندی چشم _ زدن میں

بھلا ہو ترا شہ سوارِ اذیت

بہم ہے اب آسودگی کب دلوں کو

فقط درمیا ں ہے ہمارے اذیت

مری تشنہ کامی کی سن لی خدا نے

مجھے مل گئی آ بشارِ اذیت

سفر دشت _ غم کا مزہ تب ہی دیگا

چبھیں گے جو پیروں میں خارِ اذیت

کئی دن تلک ہوش آیا نہ مجھ کو

بہت بڑھ گیا تھا فشارِ اذیت

بچھڑنا بھی تم سے کب آساں تھا ہم پے

مگر اب ھے ملنا بھی کارِ اذیت

تکان عمر بھر کی لگے خواب مجھ کو

بدن پر یو ں چھایا خمارِ اذیت

میں جب تھک گئی نیند نے آ دبو چا

کہا ں تک میں کرتی شمارِ اذیت

کسی بھی خوشی کو اماں مل نہ پائی

لہو رنگ تھا کار زارِ اذیت

الاؤ بھی حیرت زدہ تھا الم کا

بکھیرے جو میں نے شرارِ اذیت

قبائے جنوں کی مرمت کی خاطر

پرویا ھے سوئی میں تارِ اذیت

نشاں مل گئے منزلوں کے تبسم

نظر آگئے ہیں منارِ اذیت