Hum Iss Des Mein Rehte Hain, Urdu Nazam By Dr Tayyaba Rafique

ہم اس دیس میں رہتے ہیں

جہاں مجرم خود فریادی ہے

جہاں ظالم عدل کا وعظ کرے

جہاں رہبر راہ سے بھٹکا دے

جہاں منصف حق سے لڑتا ہے

ہم اس دیس میں رہتے ہیں

جہاں اچھا برا، برا اچھا ہے

جہاں جھوٹ کا بول بالا ہے

اور سچ کے منہ پے تالا ہے

منافق شان سے جیتا ہے

سچ بولنے والا پاگل ہے

ہم اس دیس میں رہتے ہیں

جہاں نوکریاں، سندیں اور عہدے

لوگوں کو نوازے جاتے ہیں

لوگوں کے لیے اصول جہاں

بنتے اور بدلے جاتے ہیں

افسر جو تمھارا کام کرے

افسر وہ بڑا ہی اچھا ہے

جو کر نا سکے بے کار ہے وہ

ہم اس دیس میں رہتے ہیں

جہاں مسئلہ بے روزگاری ہے

جب روزگار مل جاتا ہے

پھر کام تو ہم سے ہوتا نہیں

بس تنخواہ ہم نے لینی ہے

اور نوکری دوسری کرنی ہے

ہم اس دیس میں رہتے ہیں

ملازم جہاں اداروں کو

مالِ غنیمت سمجھتے ہیں

جہاں ذاتی مفاد کی خاطر

کاموں کو روکا جاتا ہے

جو جتنا اصولوں کو توڑے

وہ اتنا ہی با عزت ہے

ہیرو گردانا جاتا ہے

ہم اس دیس میں رہتے ہیں

جہاں ٹوٹی پھوٹی کرسی بھی

سب کو بڑا لبھاتی ہے

کوئی بیٹھنے کو چلے کاٹے

سودے کرے، بچھائے بساط

یہ کیسی ہوس ہے کرسی کی

کرسی نا تمھاری نا میری

کرسی تو یہ لکڑی کی ہے

لکڑی تو آگ پکڑتی ہے

لکڑی کو دیمک کھا جائے

رہ جائے بس اخلاق ترا، اخلاق مرا

اعمال ترے، اعمال مرے

کیا ہم نے کبھی یہ سوچا ہے؟

ہم جس دیس میں رہتے ہیں

وہ دیس کسی کا اپنا نہیں

وہ دیس تو ہے اس دنیا کا

جو دنیا فانی

زیست سفر

ہر شخص مسافر ، بنجارہ