Naat Paak By Aamir Souqi

چاند سورج ستارے لگائے گئے بس ترے واسطے

جھیل جھرنے سمندر بہائے گئے بس ترے واسطے

تپتے صحرا گلستاں بنائے گئے بس ترے واسطے

آب و دانہ زمیں سے اگائے گئے بس ترے واسطے

تیرے صدقے بنے ہیں یہ ارض و سما خاتم الانبیا

تو ہی مختار کل تو ہی خیر بشر اے جمیل الشیم

تیری تعظیم کرتے ہیں جھک کر شجر اے جمیل الشیم

حسن پر تیرے قربان شمس و قمر اے جمیل الشیم

تجھ پہ کیوں نا فدا ہوں یہ جان و جگر اے جمیل الشیم

دونوں عالم میں بکھرا ہے جلوہ ترا خاتم الانبیا

جس کی الفت سے دل میرا معمور ہے رب کا وہ نور ہے

جس کی مئے سے مری روح مخمور ہے رب کا وہ نور ہے

جس کا فرمان ایماں کا دستور ہے رب کا وہ نور ہے

زندہ ہے لیکن آنکھوں سے مستور ہے رب کا وہ نور ہے

اولیں بھی وہی اور وہی با خدا خاتم الانبیا

قلب افسردہ اور میری آنکھیں ہیں نم کر دو چشم کرم

فرقت شہر خوباں کا چھایا ہے غم کر دو چشم کرم

روضئہ نور اور دیکھوں بیت الحرم کر دو چشم کرم

اے حبیب خدا اے رسول حشم کر دو چشم کرم

آس پر تیری بیٹھا ہوں کر دو عطا خاتم الانبیا

آپ کی مثل کوئی نہ کوئی جواب اے رسالت مآب

آپ کے دم سے ایماں پہ آیا شباب اے رسالت مآب

زرد پتا ہوں میں آپ کھلتا گلاب اے رسالت مآب

میرے اعمال میں ہیں گنہ بے حساب اے رسالت مآب

لاج شوقی کی رکھیے گا روز جزا خاتم الانبیا