Mohabbat Nazm Or Barish By Ashraf Javed Malik

محبت اک سفر ہے سرمئی کتھئی

روپہلے اور نیلے بادلوں کا سا

کوئی بہکا ہوامنظر

جولائی کی پیاسی بارشوں جیسا

نومبراور دسمبر یا اوائل جنوری کی

دھوپ کے جیسا

کہر کی چادریں تانے ہوئے صبح کے

کسی بہروپ کے جیسا

محبت اک تصور ہے

بدلتے موسموں کے ساتھ

پچھلے طے شدہ وعدوں کی

حالت کے بدلنے کا

دیارِہجر میں محتاط چلنے کا

محبت کے تصور میں سراپا یار کا

تکمیل سے تصدیق کی تعمیل تک

جا کرسنبھلتا ہے تو وصل آغاز ہوتا ہے

نئے جیون کی خواہش

جسم کی دیوار پر چڑھتی ہوئی

پھولوں بھری اک بیل کی صورت

لہکتی ہے تو

اس کے لمس کی خوشبو

طلب میں یار کی ہر سو مہکتی ہے

مسامِ جاں کی ہر کونپل

شبِ ہجراں کی ڈھلتی

ساعتوں کے ساتھ جیون کی

کتھا تقدیر کی دیوار پہ لکھتے ہوئے

دن کی تماشاگاہ کا سامان ہوتی ہے

تو ارمانوں کی چڑیاں بول پڑتی ہیں

محبت پر معیشت

کیوں اثر انداز ہوتی ہے ؟

معیشت کے سیہ ہاتھوں سے

جیون کا سراپا مسخ ہوتا ہے

اگر محبوب

جیون کے مرتب حاشیے سے

پار تک دیکھے

جری ہو با وفا ہو

دل کی دربانی میں سادہ

اور کھرا ہو تو

محبت سبز ہوتی ہے

توانائی میں ڈھلتی ہے

کہ جیسے نظم

شاعر کے کلیجے سے نکل کر

سات رنگوں کی قبا پہنے

پہاڑی وادیوں سے ہر طرف

چشموں کی صورت چار سو

ندی بہ ندی رقص کرتی ہے

محبت نظم اور جیون

سبھی اک آسمانی موج کی صورت

میری دھرتی پہ اترے ہیں

یہ تینوں

رنگ ہیں بارش ہیں دریا ہیں

یہ تینوں

ساز ہیں سنگیت ہیں اور

رقص کی صورت گری ہیں

یہ تینوں

زندگی ہیں روشنی ہیں تازگی ہیں