Nazm - YaqeeN Ka Safar By Farrukh Hummayoun

نظم – یقیں کا سفر

کہو! ۔۔ لیکِن یقیں کے ساتھ

میں دیوانہ کہتی ہو، ۔۔

کہو! لیکِن یقیں کے ساتھ

چلو تسلیم کر لیتے ہیں ہم دیوانہ پن اپنا

چلو تُم جو بھی چاہو فرض کر لو،

مان لیتے ہیں ۔۔۔

کہو تو چھوڑ دیتے ہیں تُمہیں تکنا، تُمہیں مِلنا۔

تُمہارے راستے پر بیٹھے رِہنا مُنتظِر رِہنا

کہو تو آج ہی اِس شہر سے بھی کوچ کر جائیں

کہو تُم جو بھی کِہنا ہے، ۔۔

کہو! لیکِن یقیں کے ساتھ

**********

سُنو! اور جان لو جاناں،

کہ ہم! تُمکو ہمیشہ سے عزیز از جاں سمجھتے ہیں

محبت تُم سے کرتے ہیں ۔۔۔

کہ ہم نے اِس مُحبت سے کِنارہ کَش نہیں ہونا

ہمارا جینا مرنا مُنسلِک ہے اِس یقیں کے ساتھ

کہو! کُچھ تو یقیں کےساتھ

*****

‎سُنو! میرا یقیں ہو تُم

تُمہیں مِیں مرکزِ دِل سے بھلا کیسے جُدا کر دوں

تمہیں کیسے وِداع کر دوں

سُنو! میرا یقیں ہو تُم

تُمہں اَچھا نہیں لگتا؟ تو جانے دو،

مُجھے اِیسا ہی رہنے دو

مگر اِک بات پوچھوں؟ تُم اگر سچ سچ بتاؤ تو۔

کسی کو تُم نے بھی چاہا؟ کبھی تُم نے مُحبت کی؟

جواب اِسبات کا جاناں،

تیری آنکھوں میں دِکھتا ہے

بخوبی جانتی ہو تُم (کہ) محبت کِس کو کہتے ہیں

جو اِیسا جانتی ہو تُم، تو پِھر اِتنا تو حق دے دو

کہ میں تُم سے یہ کہہ پاؤں،مُجھے تُم سے مُحبت ہے

سُنو تُم ۔۔ اور ۔۔ یقیں کر لو

یا پِھر تُم مُجھ سے یہ کہہ دو،

کہ تُم نے کُچھ نہیں کہنا

ہمیں خاموش جینا ہے، ہمیں ایسے ہی مرنا ہے۔

مگر - اَپنی مُحبت کے -مُکمل تَر یقیں کے ساتھ

۔۔۔۔ کہو! لیکِن یقیں کے ساتھ

(فرخ ہمایوں)