Ain Si Terhi Aurat By Ghazala Pervez

(عورتوں کے عالمی دن کے حوالے سے )

میں ہوں ایک عورت

' ع ' سی بے نقطہ

حسین نہیں ، پر حسین سی ہوں

جواں نہیں، پر جواں جواں سی

دلربا نہیں، دلفریب سی ہوں

بہت ہوں مضبوط، پر ہوں صنفِ نازک

میں ہوں وہ تتلی، نُچے سے پر ہیں

مگر ہے کوشش کہ اُڑتے رہنا

گو رنگ ہیں پھیکے، مگر ہوں رنگیں

میں ہوں ایک تتلی، بس یہ خبر ہے

سبھوں کی جانب نظر چلتے چلتے

کوئ نہیں پر مجھے دیکھتا ہے

کہیں دی تھکی، کہیں پوچھے آنسو

کسی کو سنبھالا سنبھلتے سنبھلتے

شرم و حیا اور ادب کا زیور

جو ماں نے پہنا کے رخصت کیا تھا

اُتارے نہیں ، ہاں وقت کے ساتھ میں نے

اُوڑھنی میں ہیں ٹانکے نۓ کچھ ستارے

ہے گول روٹی بھی فخر میرا

اور میری بیٹی بھی شان میری

ہیں میرے طالب علم جان میرے

اور میرے فسانے بھی تعبیر میرے

لگائ سرخی تو سیٹیاں بجی تھیں

ہوئ جو رنگیں تو سب نے دیکھا

سنبھالا دینے جو نکلی گھر کو

تو بے شمار اُنگلیاں اُٹھی تھیں

کسی نے کھینچے تھے پاؤں میرے

کسی نے روکا تھا راستہ میرا

کُھلے قفس کے باہر تھی چڑیا

تو پر کُترنے کو سب بڑھے تھے

رفو کیا کہیں سے پھٹی تو

مرحم بھی رکھا جو زخم کھاۓ

رہی مسکراتی، رہی کھلکھلاتی

چھپایا تھا آنسو ، جب رو پڑی تو

میں ایک سادہ، بہت عام عورت

تھوڑی سی شوخ اور شرارتی ہوں

میں اپنی ذات میں ہوں مکمل

بنا کوئ نقطہ، ' ع ' سی ٹیڑھی عورت

میں ہوں ایک عورت

غزالہ پرویز