Nostalgia By Muhammad Usman

سرپٹ دوڑتے وقت کے پیروں سے اڑتی دھول میں گم ہوتے کچھ بھول جانے والے کچھ یاد رہ گئے سارے چمکتے منظروں کے نام ایک ماضی سے جڑے آدمی کا نوحہ

گھروندہ

اسی آنگن میں میرے بچپن نے

پیر پیر چلنا سیکھا

یہیں ککلی، پکڑن پکڑائی، چھپن چھپائی،

کوکلا چھپاکی بچپن کی ننھی آنکھوں

سے جھانکتے ہیں

میں بہت بلاتا ہوں انہیں

مگر وہ اپاہج ہیں

چاہ کے بھی قدم بڑھا نہیں پاتے

اسی مٹی پہ میں نے اپنی بچپنے،لڑکپن،جوانی

درمیانی عمر کی کینچلی بدلی تھی

دو ایک پیڑ تھے آموں کے

ہر سال برسات میں کوئل ان کی رگوں میں

اپنی مدھر آواز کا رس بھرتی تھی

سنبل کی آنکھوں سے ہر سال

روئی اگتی تھی

جمع کرتی تھی اک بڑھیا اسے

اور اپنے نرم ہاتھوں سے دھنتی تھی

اپنی مامتا کی کھڈی پہ اپنے پوتے پوتیوں

کے لئے رومال بناتی تھی

جن کا لمس بھی کبھی میسر نہیں آیا اسے

پھر اسے اپنے لئے جذبات سے عاری بیٹے کے

تکیے میں بھرتی تھی پوروں سے

ان پوروں کے لمس میں لوری بھی تھی

ذرا دور اک دڑبہ ہے کچی مٹی سے لیپا ہوا

جس میں دو ایک مرغیاں ہیں

بوڑھی عورت سے کوئی بات نہیں کرتا

میں نے دیکھا ہے اسے جلتی دوپہروں

میں مرغیوں سے باتیں کرتے

وہ ان کی بولی جانتی ہے

دانہ ڈالتے وہ ان سے کتنی باتیں کرتی تھی

وہ بڑھیا کی ساری باتیں کان لگا کے سنتی تھیں

پاس ہی دڑبے کے ایک نابینا کتا بیٹھا اونگھا کرتا

اسے وفا داری کی بیماری تھی

بڑھیا کی مرغیوں کی پکھیروؤں کی حفاظت

اس کی بے نور آنکھوں کی ذمہ داری تھی

وہ زخمی تھا کسی بھی کھٹکے پہ وہ

بے اختیار بھاگتا تھا اور کسی درخت سے

ٹکراتا تھا زخمی تھا وہ سارا ہی

میں سوچتا تھا یہ غار والے مقدس لوگوں

کے کتے کی نسل سے ہے

ہاں اسے اسی کی نسل سے ہونا چاہیے

کبھی کبھار جب میں ماں باپ سے نظر بچائے

ننگے پیر جوان الہڑ بھرپور بھرے جسم والی

دوپہروں میں

چپکے سے اس بڑھیا کے پاس

آنگن میں لگے برگد کے نیچے بیٹھتا تھا

وہ کوئل کی آواز سن کے مجھے سلاتی تھی

گیت گنگناتی تھی

"امباں نی شوکر نے"

"بدلاں نی کوکر نے"

"میرا پتر سلا دتا"

مسمیوں کے پیڑ پہ گھر ہے

دو پکھیروؤں کی امیدوں کا

تنکا تنکا اکھٹا کرتے وہ

ایک گھونسلہ بناتے ہیں

پیار بھرے اس گھونسلے میں

مادہ انڈے دیتی

انہیں سینے کی تکلیف سے گزرتی ہے

دو ہی بوٹ ہیں پکھیروؤں کی امیدوں چراغ

وہ بڑھیا کہتی تھی

کس محبت سے یہ گھروندا بنایا تھا

دونوں نے

ننھے پکھیرو پر لگتے ہی اڑ گئے

واپس نہیں آئے

شاید وہاں ان پکھیروؤں کی دنیا میں بھی کوئی

نسلی تفاوت

کی بیماری ہو گی

وہ بڑھیا، نابینا کتا، پکھیرو، سنبل،روئی، مرغیاں، پودے، پیڑ

کسی ان دیکھی دنیا کی طرف کوچ کر گئے

دوبارہ ملے نہیں کبھی خواب میں بھی

گئے وقتوں میں سنے

کسی سنہرے گیت جیسا

وہ متاع جاں مٹی وہ مہرباں بڑھیا

وہ گھروندا اب نہیں ہے