Abu Ji Ky Nam Aik Khat By Rj Malik

سوچتی ہوں میں اک خط لکھوں

آپ کے نام

پھر سوچتی ہوں اس خط کا

انداز تخاطب کیسے ہو

وہ جو برسوں سے ہے ہی نہیں !

وہ شخص میرا مخاطب کیسے ہو؟

بالفرض میں لکھنا شروع کروں تو کیسے لکھوں

پاپا جانی

بابا سائیں

پیارے ابا

یا ابو جی

ان میں سے کچھ لکھ بھی لوں تو

خط کے متن میں کیا کیا لکھوں

فقط سنی سنائی باتیں ؟

سچ پوچھیں تو میرے دل میں

آپ کی ایک بھی یاد نہیں ہے

(باقی سب کی طرح

آپ کے بارے میں کہنے کو

میرے پاس

کوئی لمبی چوڑی رٌوداد نہیں ہے)

آخر دن ہی کتنے آئے تھے میرے حصے میں

آٹھ مہینے ___ تھوڑے ہیں نا

پچیس سال میں آٹھ مہینے

تھوڑے ہیں نا ؟؟؟

آٹھ مہینے کے بچے کو

کچھ یاد رکھنے کی اجازت نہیں ہوتی ہے

اب آپ بتائیں آپ کے بارے میں

کس سے پوچھوں، ماں سے پوچھوں ؟

ماں سے پوچھنے کی ہمت نہیں ہوتی ہے

میں نے دیکھا تھا اک روز بچپن میں

ماں نیند میں بھی روتی ہے !

اٌس کی گال پہ آنسو ٹکا تھا

(دل نہیں مانتا وہ آنسو تھا

کہتا ہے جنت کا موتی ہے )

پھر وہی بات ___

ماں سے پوچھنے کی ہمت نہیں ہوتی ہے!

اب ماں سے نہیں تو کس سے پوچھوں

بہنوں سے ___ بھائیوں سے پوچھوں

اٌن کو تو سب یاد ہی ہوگا

اک اک لمحہ

اک اک منظر

چھوٹی چھوٹی خوشیوں کے دن

دٌکھ کی لمبی لمبی راتیں

پھر سے لا یعنی سی باتیں

(فقط سٌنی سٌنائی باتیں)

شاید میں متن سے بھٹک رہی ہوں

اس لئے ان لا یعنی باتوں کو

ذہن سے جھٹک رہی ہوں

اور دیکھیں

خط بھی لمبا ہوتا جا رہا ہے

جیسے جیسے میں لکھ رہی ہوں

(یوں لگتا ہے جیسے)

میرا ہر لفظ اپنی اہمیت کھوتا جا رہا ہے

اب اجازت۔۔۔

آپ کی پیاری

چینی گٌڑیا

چھوٹی بیٹی

یا کچھ اور

ان میں سے کچھ لکھ بھی لوں تو

آپ کو یہ خط کیسے پڑھاؤں

آپ کے بعد جو ھم پہ گٌزری

اک خط میں کیسے بتلاؤں

اپنی سوچیں __ اپنی منطق

لوگوں کو کیسے سمجھاؤں

دیکھیں کتنی مشکل میں ہوں

آکر دیکھیں

اپنی سوچیں

ایک صفحے پہ اٌتار رہی ہوں

ساری سوچیں

ساری یادیں

اک اک کر کے مار رہی ہوں

اپنی ایک بٌری عادت بتلاؤں بابا

جب اتنا سب سوچ کے میں اٌکتا جاؤں تو

ان بے معنی سوچوں سے تنگ آ جاؤں تو

سوچ کا دامن جھاڑ دیتی ہوں

آپ کے نام لکھے ہر خط کو

میں بس ایک دفعہ پڑھ کر پھاڑ دیتی ہوں

اس لئے میں نے سوچ لیا ہے

میرا یہ خط آپ کے نام آخری پیغام ہے

آپ شاید نہیں جانتے مگر

مرے ہوئے باپ کو خط لکھنا

دنیا کا سب سے مشکل کام ہے !