Rafta Rafta By Zeeshan Ahmad Zaki

رفتہ رفتہ محبت کا بے ساختہ پن اتر ہی گیا

تشنگی کھو گئی اور احساس میں بَن اتر ہی گیا

لڑکپن اور جوانی کے سارے کچوکے رفو ہو گئے

رفتہ رفتہ ہمارا نئے دور میں مَن اتر ہی گیا

رفتہ رفتہ وفا کے معانی زمانے میں حل ہو گئے

رنج و آوارگی، کام پر آنے جانے میں حل ہوگئے

وصل کی خواہشوں کے وہ آسیب ہستی پہ ٹھہرے نہیں

جو بچے تھے، حقیقت کے اک تازیانے میں حل ہوگئے

گردشِ وقت نے خواب کو نیند ہی سے جدا کر دیا

فکر فردا نے مدہوش رہنے کا قصہ فنا کر دیا

بادہ و ساغر و مے کی رسمیں سبھی ترک ہوتی گئیئں

سوچ نے اِس طرح زندگی کے کِواڑوں کو وا کر دیا

عمرِ رفتہ کی سب شوخیاں یاد کرنے میں ڈر آگیا

بے بسی اور بے چارگی میں اچانک جگر آ گیا

اب تو ایسا ہے دل دیکھ کر بھی اُنہیں، ڈگمگاتا نہیں

یوں بِالآخر ہمیں عشق سے بے رخی کا ہنر آ گیا

اب فراوانیٔ یادِ جاناں میں تخفیف ہونے لگی

اور تو اور اپنی ہی خلوت سے تکلیف ہونے لگی

اب تو آنکھیں، وہ گیسو، وہ عارض وہ لب

عام سے رہ گئے اور مشکل وہ تعریف ہونے لگی

دیر تک چاند کو دیکھنے کا جواز اب نہیں مل رہا

نغمہ ٔ دید کی دُھن کا کیا ہو کہ ساز اب نہیں مل رہا

لفظ ہاتھوں کی پوروں سے کوسوں کہیں دور جا کے بسے

جو کبھی ہم میں رہتا تھا جدّت طراز اب نہیں مل رہا

ہم شب وروزرہتے رہے جاں بلب، جائیے چھوڑئیے

تھی ہمیں اک اُسی شخص کی ہی طلب، جائیے چھوڑیئے

ما سِوا اُس کے کچھ خیال آتا نہیں تھا مسلسل ہمیں

اب تو لگتا ہے یہ جھوٹ تھا سب کا سب، جایئے چھوڑیئے

شام کے سرخ لب، ہجر کا کوئی نوحہ سناتے نہیں

ادھ کھُلی کھڑکیوں سے وہ مانوس جگنو اب آتے نہیں

رات کی مضطرب کروٹوں میں کبھی کا قرار آ گیا

اب وہ خدشے کسی سے جدائی کے یکسر ستاتے نہیں

رفتہ رفتہ وہ دل پہ چڑھی بیل چاہت کی کھلنے لگی

رفتہ رفتہ وہ جذبات کی خاک سانسوں سے دُھلنے لگی

رفتہ رفتہ نشہ عشق و مستی کا ناکام ہوتا گیا

رفتہ رفتہ یہ معمول کی زندگی ہم میں گھُلنے لگی

رفتہ رفتہ ہمارے لہو میں ذکیؔ دَھن اتر ہی گیا

لڑکپن اور جوانی کے سارے کچوکے رفو ہو گئے

رفتہ رفتہ ہمارا نئے دور میں مَن اُتر ہی گیا