Chalo Phir Baat Karte Hain Kisi Guzre Hue Pal Ki, Urdu Nazam By Zaeem Arshad

چلو پھر بات کرتے ہیں کسی گزرے ہوئے پل کی

کسی گزری ہوئی کل کی

چلو پھر بات کرتے ہیں محبت کے زمانوں کی

خوشی کی داستانوں کی

وہ گلیاں وہ محلے جو کبھی ہم سب کے سانجھے تھے

وہ چوبارے، دریچے، صحن در سب کچھ ہمارے تھے

گلی کا ایک بزرگ سب کا دادا نانا ہوتا تھا

وہ جو کہتا تھا اس کو خوشدلی سے مانا جاتا تھا

کسی کے گھر کوئی سوغات بنتی تھی یا آتی تھی

تو وہ سارے گھروں میں تھوڑی تھوڑی بانٹی جاتی تھی

خوشی میں اور غم میں سارے مل کر ساتھ ہوتے تھے

گلے مل مل کے ہنستے تھے گلے لگ لگ کہ روتے تھے

بڑوں کا احترام، بچوں سے سب کے پیار ہوتا تھا

کسی کے گھر بھی آیا ہو وہ مہماں، سب کا ہوتا تھا

گلی کے نوجواں لڑکے سب ہی کے کام آتے تھے

بلاتفریق جو مل جائے سب اس کو بلاتے تھے

نہیں تھیں رنجشیں چاہت کا گھر گھر دور دورہ تھا

ترقی نہ تھی اتنی پیسے کم تھے پیار گہرا تھا

دریچے دل کے اور دروازے وا تھے ہر گھڑی ہر پل

سمے بھی تھم کیا تھا خوشیوں کے ایسے حسیں تھے پل

زمانے اب وہ یاد آتے ہیں تو دل ٹوٹ جاتا ہے

نگاہوں میں وہی منظر پرانا لوٹ آتا ہے