Pehli Baraf Bari, Urdu Nazam By Zahoor Nazar

نیلگوں ابر چھٹا

سرمئی شام کے سورج کی طلائی کرنیں

مرمریں برف کے بلور بدن پر برسیں

جھومتے پیڑوں کی باہوں میں مہکتے جھونکے

پینگ سی لے کے پری چہرہ منڈیروں کی جبیں پر امڈے

دھند کی ملگجی آغوش میں خوابیدہ مکانوں کی چھتوں نے اپنی

چھاتیاں کھول کے انگڑائیاں لیں

زلزلہ تھا کہ مرا وہم تھا کچھ تھا جس سے

تھرتھرا اٹھے مرے ہاتھ اور ان کے نیچے

جھنجھنا اٹھی تھی یوں بالکنی کی ریلنگ

جیسے بج اٹھیں کسی ساز کے تار

اور میں لوٹ کے کمرے میں چلا آیا تھا

احمریں شال میں لپٹی ہوئی اک لڑکی نے

چائے کی پیالی مرے ہاتھ میں دیتے ہوئے ہولے سے کہا تھا اب تو

اس سکوں زار میں کوئی بھی نہیں اپنے سوا

تم جنہیں روگ سمجھتے تھے وہ سب لوگ گئے

اولیں برف کے پڑتے ہی مری کا ہر گھر

بے صدا چھوڑ گئے اس کے مکیں

شور کا نام نہیں

اب تو یوں چپ نہ رہو

جی میں آیا تھا کہ اس سے کہہ دوں

سب کہاں تم تو ابھی تک ہو یہاں پر لیکن

جانے کیا سوچ کے خاموش رہا