شکن بترا کی فواد خان کے ساتھ دوبارہ کام کرنے کی خواہش

ممبئی(اُردو پوائنٹ اخبارتازہ ترین - آن لائن۔ 19 جولائی2017ء) پاکستانی اداکار فواد خان کے صرف یہاں ہی نہیں بلکہ دنیا بھر میں بہت مداح ہیں، ان میں سے ایک بولی وڈ اداکار شکن بترا بھی ہیں۔فواد خان اور شکن بترا نے ایک ساتھ گزشتہ سال کی کامیاب فلم 'کپور اینڈ سنز' میں کام کیا تھا۔ ہدایت کار شکن بترا نے پاکستان اور ہندوستان کے درمیان بہتر حالات قائم ہونے کی امید کا اظہار کیا، تاکہ وہ دوبارہ فواد خان کے ساتھ کام کرسکیں۔

آئیفا ایوارڈز کے دوران شکن بترا نے میڈیا سے بات کرتے ہوئے کہا کہ 'میں نے گزشتہ روز فواد خان سے بات کی، مجھے وہ بہت یاد آتے ہیں، کاش وہ یہاں ہوتے، گزشتہ سال ہم دونوں ایک ساتھ آئیفا میں موجود تھے، بدقسمتی سے ایسے حالات ہوگئے کہ سن تبدیل ہوگیا، امید ہے آگے دونوں ممالک دوبارہ ایک دوسرے کے دوست بن جائیں اور مل کر کام کرسکیں'۔

(جاری ہے)

ایسا پہلی بار نہیں جب شکن بترا نے فواد خان کے حوالے سے بات کی ہو، اس سے قبل ایک انٹرویو کے دوران ان کا کہنا تھا کہ 'مجھے فواد خان کی بہت یاد آتی ہے، میں نہیں جانتا مجھے اس حوالے سے اتنا کھل کر بات کرنی چاہیے یا نہیں، مجھے ان کے ساتھ کام کرنے بہت مزاح آیا تھا، ہم ہندوستانی دنیا بھر میں قانونی طور پر کام کرتے ہیں، اور اگر کوئی اور ہمارے ملک میں کام کرنا چاہے تو اسے بھی سکون سے کام کرنے دینا چاہیی'۔

فواد خان نے ہندوستان میں مقبولیت اپنے کامیاب ڈرامے 'ہمسفر' کے باعث حاصل کی، جس کے بعد انہیں 2014 میں بولی وڈ فلم 'خوبصورت' میں کام کرنے کی پیشکش ملی۔فلم 'خوبصورت' کے بعد فواد خان نے 2016 میں 'کپور اینڈ سنز' میں کام کیا، جس کے بعد ہدایت کار کرن جوہر نے فواد خان کو فلم 'اے دل ہے مشکل' میں معاون کردار کے لیے کاسٹ کیا۔تاہم گزشتہ برس ستمبر میں کشمیر میں اڑی کے مقام پر ہندوستانی فوجی کیمپ پر حملے کے بعد پاک-بھارت تعلقات کشیدہ ہونے کی وجہ سے انڈین فلم ایسوسی ایشن نے پاکستانی فنکاروں پر ہندوستان میں کام کرنے پر پابندی عائد کردی، جس کے باعث فواد خان فلم 'اے دل ہے مشکل' کے بعد کسی بولی وڈ فلم میں کام نہیں کرپائے۔۔